Kina shpall nisjen e luftës tregtare me SHBA

Dy fuqitë më të mëdha ekonomike të botës janë në një luftë tregtare tashmë, që rrezikon të përfshijë edhe vende të tjera për shkak të vendimit të Presidentit të SHBA, Donald Trump. Shtëpia e Bardhë tha se do të impononte tarifat prej 25 për qind ndaj mallrave kineze me vlerë 50 miliardë dollarë. Presidenti Trump e kishte bërë që në muajin mars këtë kërcënim. Në maj u vendos “paqe”, por të premten e 15 qershorit Trump bëri njoftimin e ri. “SHBA vazhdon të ndryshojë mendje dhe tani nisi një luftë tregtare”, tha ministria e Tregtisë së Kinës në një deklaratë. Qeveria kineze u zotua se do të përgjigjet në të njëjtën mënyrë. “Kina nuk e do një luftë tregtare, por do kundërpërgjigjet në rigorozitet në mbrojtje të interesave të saj kombëtare, globalizimit dhe sistemit tregtar botëror… Ne do të nisim menjëherë masat e tarifave që do të barazohen me shkallën dhe intensitetin e atyre që u nisën nga SHBA”. Pekini, po ashtu, njoftoi se “të gjitha marrëveshjet ekonomike dhe tregtare të arritura në negociata e mëparshme do të anulohen në të njëjtën kohë”. Shtetet e Bashkuara tashmë kanë vendosur tarifa për çelikun dhe aluminin nga Kanadaja, Meksika dhe Bashkimi Europian. Të gjithë kanë premtuar të kundërpërgjigjen. “Ne u bëjmë thirrje të gjitha vendeve të veprojnë së bashku për të ndaluar me vendosmëri një lëvizje të tillë të vjetruar dhe të prapambetur dhe për të mbrojtur me vendosmëri interesin e përbashkët të të gjithë njerëzimit”, reagoi Ministria kineze e Tregtisë.