Kryeministrin e presin me protesta në Dibër, PD: U dhunua deputeti Gjunkshi
Partia Demokratike dhe simpatizantët e saj në Dibër e kanë pritur Kryeministrin Edi Rama me protesta. Njësoj si në takimet e tjera të zhvilluara nga kreu i qeverisë, dibranët ishin organizuar me pankarta në duar për të protestuar kundër qeverisë. Në krye të protestuesve të PD- së ka qenë deputeti i Dibrës, Xhemal Gjunkshi, i cili u përplas edhe me forcat e Policisë. Partia Demokratike denoncoi menjëherë dhunën e ushtruar ndaj deputetit të saj. Sipas demokratëve, deputeti Gjunkshi ka shenja të dhunës në trup nga tërheqja e efektivëve të Policisë. Për demokratët sjellja e policëve është një akt i paligjshëm ndaj një deputeti të Kuvendit të Shqipërisë. PD publikoi edhe pamje të autobusëve që sillnin njerëz për takimin që Kryeministri Rama zhvilloi në Dibër. Sipas demokratëve, autobusët që erdhën nga Burreli dhe Bulqiza drejt Dibrës ishin të mbushura me të punësuar në administratë të sjellë me detyrim në takimin e thirrur nga kreu i qeverisë. Demokratët protestuan edhe në takimin e Panairit të Punës që kreu i qeverisë zhvilloi në Dibër. Në një njoftim të shpërndarë nga selia blu, Panairi i Punës u cilësua si një cirk shëtitës i Kryeministrit, pasi menjëherë pas përfundimit të takimit, ai u boshatis dhe të gjithë pjesëmarrësit u larguan. "Dibranët nxjerrin zbuluar Edi Ramën dhe mashtrimin e tij me Panairin e Punës. Si në çdo bashki tjetër, edhe në Dibër, Edi Rama shkoi me një panair më vete, të bërë gati që në Tiranë. Me të ikur Edi Rama, Panari u shpërbë, duke e shndërruar atë në një mjet propagandistik për Kryeministrin, larg realitetit të dibranëve pa punë dhe pa investime", thuhet në njoftimin e shpërndarë në PD. Me protesta, Kryeministrin Edi Rama e pritën edhe në Klos. Demokratët ishin organizuar me pankarta për t'i kërkuar Ramës të largohet, duke bllokuar edhe segmentin në të cilin do të kalonte Rama. Mbështetësit e PD- së qëndronin me pankarta dhe thirrje kundër. "O kryemashtrues shporru nga Klosi dhe qeveria", thuhet në parullat e qytetarëve. Por, sipas Partisë Demokratike, Rama ka preferuar të lëvizë me helikopter dhe në videon e vënë në dispozicion nga selia blu dallohet një helikopter ushtarak në qarkullim në drejtim të Klosit. Por lidhur me këtë pretendim të demokratëve, Kryeministria ka sqaruar zyrtarisht se Kryeministri ka shkuar me makinë në drejtim të Klosit dhe jo me helikopter. Demokratët vijojnë me strategjinë e protestave në çdo qytet në të cilin Kryeministri Rama zhvillon takime me qytetarët në vijim të turit të tij të llogaridhënies.