Largimi i dy deputeteve, Idrizi: Kanë qenë kandidate të PDIU, kaluan me PS pas zgjedhjeve

Kryetari i PDIU- së, Shpëtim Idrizi, i cilësoi lajme të vjetra largimet e dy deputeteve nga forca e tij politike në drejtim të Partisë Socialiste. Përmes një reagimi në "Facebook", Idrizi sqaroi se deputetet Reme Lala dhe Elena Xhina thjesht kanë garuar nën siglën e PDIU- së, pasi prej kohësh kanë deklaruar se janë me PS- në. "Lajmet e vjetra që sot shiten si të reja, për individë që kanë qenë thjesht kandidatë të PDIU- së, sepse janë deklaruar me PS- në qysh në përfundim të zgjedhjeve, nuk sjellin asnjë ndryshim në veprimtarinë tonë politike për zgjidhjen e "çështjes çame". "Çështja çame" na bashkon dhe na ndan me këdo ... si një kauzë jo vetëm e jona, po e çdo shqiptari brenda dhe jashtë kufijve", thuhet në reagimin e PDIU- së, të shpërndarë edhe nga kreu i kësaj force politike, Shpëtim Idrizi. Largimin e deputetëve të dalë në zgjedhje nga sigla e PDIU- së drejt maxhorancës, Idrizi e paralajmëroi që nga Këshilli Kombëtar i kësaj force politike, i zhvilluar një javë më parë. Sipas Idrizit, ka pasur një strategji të mirëfilltë për t'i lënë çamët jashtë Parlamentit të Shqipërisë në këtë legjislaturë. Gjatë mbledhjes së Këshillit Kombëtar të PDIU- së ra në sy mungesa e tre deputetëve të Parlamentit të zgjedhur nën siglën e kësaj force politike. Idrizi deklaroi se çamët janë të papërfaqësuar në Parlament. "Pas një viti që u krye ai turp që guxuan t'i quajnë zgjedhje, pasojat e së cilës e mungesën e një vizioni në ekonomi apo sherrin politik për kanabizimin e shoqërisë po i vuajmë përditë, unë jam i bindur se kemi pasur të bëjmë me një strategji të mirëfilltë për të lënë Çamërinë pa përfaqësues në Kuvendin e Shqipërisë", tha Idrizi.