Këshilli Bashkiak shpall “Qytetar Nderi” të Hasit atentatorin e Azem Hajdarit
Me 13 vota pro dhe 1 abstenim, Gafurr Mazreku nderohet “Për kontribut të pashoq”. Kush është deputeti që qëlloi në Kuvend
Këshilli Bashkiak i Hasit vendosi të shpallë “Qytetar Nderi” ish- deputetin e PS- së, Gafurr Mazreku, dy dekada pas ngjarjes së shtatorit 1997, kur ai nxori armën dhe qëlloi me pesë plumba brenda Parlamentit Azem Hajdarin.
Me 13 vota pro dhe 1 abstenim, përfaqësuesit e maxhorancës në Këshillin Bashkiak të Hasit shpallën ‘ Qytetar Nderi’, pas vdekjes, Gafurr Mazrekun, me motivacionin ‘ Personalitet intelektual, për kontributin e pashoq në pushtetin vendor”. Demokratët e paralajmëruan një vendim të tillë që në datën 14 qershor, kur edhe në mbledhjen e Këshillit u paraqit propozimi për nderimin e ish- deputetit, Gafurr Mazreku. Sipas demokratëve, nderimi i një deputeti që ka përdorur armën brenda sallës së Parlamentit kundër Azem Hajdarit, është modeli që Edi Rama ka ndjekur qëkur ka ardhur në pushtet. Vendimin e marrë në mbledhjen e kësaj të hëne në Këshillin e Hasit, përfaqësuesit e opozitës e kundërshtuan dhe e cilësuan të paligjshëm. Myftar Dauti, kryetari i Këshilltarëve të Djathtë në Has, deklaroi se vendimi për nderimin e Mazrekut ishte marrë pa prezencën e opozitës në mbledhjen e Këshillit. “Vendimi është i jashtëligjshëm pasi është marrë pa prezencën e këshilltarëve të djathtë. Ne kërkuam 5 minuta pushim për konsultime, ndërkohë që këshilltarët e majtë e kanë miratuar propozimin e administratës së bashkisë. I bëj thirrje prefektit që të mos e miratojë këtë vendim”, tha këshilltari i PD- së. Për aktin e ndodhur në sallën e Parlamentit në shtator 1997, Mazreku u dënua me 11 vjet heqje lirie, por sjelljet e mira dhe amnistitë e herëpashershme, e ulën dënimin e tij, duke sjellë edhe lirimin e tij në 2001. Në vitin 2002, Mazreku zgjidhet unanimisht kryetar i PS- së Has, por zgjedhja e tij u refuzua nga Komisioni i Garancive Statusore. Në vjeshtën e vitit 2003, Mazreku fitoi postin e kryetarit të Komunës Fajzë, ndërkohë që në 2005, pas një infarkti, ai u nda nga jeta.
NGJARJA Debati për radhën që do të mbanin deputetët në foltoren e Parlamentit, nxiti ish- depute- tin e PS- së në Has, Gafurr Mazreku, të qëllonte me pesë plumba brenda sallës së Parlamentit ish- deputetin e PD- së, Azem Hajdari, në 18 shtator 1997. Një debat nga ato që sot i shohim rëndom në seancat parlamentare, dy dekada më parë, shkaktoi një ngjarje të paprecedent në sallën e Parlamentit. Mazreku tentoi të eliminojë fizikisht kolegun e tij të opozitës, vetëm për shkak të radhës që do të mbanin në foltore. Sipas pamjeve filmike të asaj seance plenare, duket se Azem Hajdari kishte kërkuar fjalën për procedurë, ndërkohë që radhën për të folur e kishte ishdeputeti i PS- së, Fehmi Abdiu. Kërkesa për të marrë fjalën në seancë u refuzua nga drejtuesit e Parlamentit, Skënder Gjinushi dhe Namik Dokle, dhe në foltore u afrua të marrë fjalën ish- deputeti Fehmi Abdiu. Me insistim të vazhdueshëm, Hajdari afrohet në foltoren e Parlamentit dhe i kërkon Abdiut të largohet në mënyrë që ai të flasë për procedurë. Në këtë moment, në foltore afrohet deputeti i Hasit, Gafurr Mazreku, i cili i kërkoi Azem Hajdarit të largohet dhe të flasë pas tij, duke u përplasur edhe verbalisht me ish- deputetin e PD- së. Përplasja verbale mes dy deputetëve agravoi në përplasje fizike, ndaj edhe nënkryetari i Parlamentit, Namik Dokle, njoftoi ndërprerjen e seancës. Episodi i ndodhur në sy të kamerave, por edhe të deputetëve të pranishëm në sallë, nuk u kalua lehtë nga deputeti i Hasit, Gafurr Mazreku. Disa ditë pas kësaj përplasjeje në një tjetër seancë plenare, Mazreku vjen i armatosur në Kuvend dhe qëllon me pistoletë në drejtim të Azem Hajdarit.