Krerët e komuniteteve fetare, letër Macron e Merkel: Hapni negociatat
Kur duhen edhe 10 ditë nga vendimi që pritet të marrë Këshilli Europian për negociatat me Shqipërinë, krerët e komuniteteve fetare në Shqipëri i kanë dërguar një letër Kancelares Merkel dhe Presidentit francez Macron, ku u kërkojnë dhënien e dritës jeshile për Shqipërinë. “Ju bëjmë thirrje të pranoni dëshirën e sinqertë të të gjithë shqiptarëve dhe të na mbështesni në angazhimin tonë të pakthyeshëm për një Shqipëri si pjesë e Europës,- thuhet në letër. Rruga drejt Bashkimit Europian është veçanërisht kritike për rininë tonë. Të rinjtë shqiptarë renditen mes euro- entuziastëve më të fuqishëm, e megjithatë ata ndihen më të frustruar, sepse edhe pse jetojnë pranë shokëve të tyre europianë, janë të përjashtuar nga të njëjtat mundësi. Mbështetja juaj për Shqipërinë në procesin e pranimit në këtë moment kritik, kur vlerat e tolerancës, solidaritetit dhe të drejtave të njeriut kërcënohen nga radikalizmi, fanatizmi dhe ideologji të tjera si këto, është shumë i rëndësishëm. Ju bëjmë thirrje të pranoni dëshirën e sinqertë të të gjithë shqiptarëve dhe të na mbështesni në angazhimin tonë të pakthyeshëm për një Shqipëri si pjesë e Europës. Me lutje të zjarrtë, ne riafirmojmë angazhimin tonë për të mbetur mbështetës të palëkundur të vlerave europiane të një shoqërie me liri, drejtësi dhe prosperitet për të gjithë”, thuhet në letër. Letra është firmosur nga krerët e bashkësive fetare në Shqipëri, kryetari i Komunitetit Mysliman Skënder Brucaj, kryepeshkopi i Tiranës dhe i Durrësit dhe i gjithë Shqipërisë i Kishës Ortodokse Autoqefale, prof. dr. Anastasios, sekretari i përgjithshëm i Konferencës Episkopale Shqiptare dhe Arqipeshkvi i Rrëshenit, Imzot Gjergj Meta, Kryegjyshi Botërior i Kryegjyshatës së Bektashinjve Haxhi Dede Edmond Brahimaj dhe Presidenti i Vëllazërisë Ungjillore të Shqipërisë, Pastor Ylli Doci.