Vëllai i Violetës: Iku nga shtëpia, kishte shenja dhune
Vëllai i 35- vjeçares Violeta Donaj, që vrau burrin e saj, tregon se çifti kishte konflikte gjatë kohëve të fundit, ndërsa pak ditë më parë motra e tij ishte larguar nga shtëpia për të qëndruar në banesën e prindërve të saj. Ditën e ngjarjes, kur edhe ndërmori aktin e rëndë, ajo iu ka thënë familjarëve se do shkonte në shtëpinë e saj për të marrë rrobat e saj dhe të vajzës. Nëna e dy fëmijëve, një vajze 14- vjeçare dhe një djali 7- vjeçar, e shoqëruar edhe nga kunata, ka marrë rrugën nga shtëpia e prindërve për në shtëpinë e saj, por askush nuk di të thotë me saktësi pse ndaloi në treg, aty ku Kujtim Donaj ka qenë duke hapur mallin në tezgë. Vëllai i 35- vjeçares thotë se nuk e ka idenë se ku mund ta ketë gjetur Violeta armën e krimit. Por, nga ana tjetër, ai shprehet se Violeta i ka treguar shenja të dhunës së ushtruar nga bashkëshorti i saj, gjë e cila e kishte detyruar të ikte nga shtëpia. "Ne s'kemi pas dijeni në lidhje me ngjarjen, di që kanë pas konflikte të vazhdueshme dhe për këtë motra iku nga shtëpia. Motra më ka treguar edhe shenjat e dhunës në trup. Por nuk dija asgjë për veprimet që do kryente. Të dielën në mëngjes na tha që do shkonte në shtëpi të merrte rrobat. Shkoi bashkë me bashkëshorten time", thotë i vëllai. Mësohet se Violeta është shoqëruar nga kunata deri te tregu e aty i ka thënë se duhet të mbaronte një punë dhe më pas është afruar te bashkëshorti i saj, Kujtimi. Pasi kanë debatuar, Violeta mësohet se e ka qëlluar katër herë me pistoletë.