Gafurr Mazreku shpallet “Qytetar Nderi”, miku i Azemit: Si e qëlloi me 5 plumba në Parlament
EMRAT E 13 KESHILLTAREVE TE KOALICIONIT QEVERITAR NE HAS QE VOTUAN PRO DEKORIMIT TE ATENTATORIT. REAGON PD E RAMA
Nënkryetari i Grupit Parlamentar Demokrat, Gent Strazimiri, akuzoi Kryeministrin Rama se urdhëroi këshilltarët e majtë në Bashkinë Has që të nderojnë atentatorin e Azem Hajdarit “Qytetar nderi” të Hasit. “Urdhri kriminal i Edi Ramës për të nderuar atentatorin e Azem Hajdarit është rilindje e së shkuarës më antieuropiane të vendit! Në një akt të pashembullt dhe kriminal, Edvin Kristaq Rama shpalli sot “Qytetar nderi” të Hasit atentatorin e liderit të lëvizjes së dhjetorit, Azem Hajdari. Vendimi i përfaqësuesve të Edi Ramës në Këshillin Bashkiak të Hasit u mor 3 ditë pasi Partia Demokratike i bëri thirrje kryetarit të Partisë Socialiste të Shqipërisë të ndalojë vendimmarrjen kriminale të këshilltarëve, të cilët janë plotësisht nën kontrollin e tij. Prandaj, Edvin Kristaq Rama nuk fshihet dot sot dhe as mund të lajë duart si Pilati!”, u shpreh Strazimiri në një dalje nga selia e PD- së. Sipas PD- së, vendimi i Ramës është vijim i vendimeve që ka marrë dhe babai i tij. “Vendimi për të nderuar vrasësin e Azem Hajdarit është gjest revanshi i bijve të kupolës së bandës së xhahilëve, që sundoi për 46 vjet mbi gjakun e këtij populli; Është vendim i Edvin Kristaq Ramës, i Ditmir Sulejman Bushatit, i Ilir Hamit Beqjes, i ministrit të Brendshëm të Ramiz Alisë, Gramoz Ruçi, i hetuesit torturues të komunizmit kundër Lëvizjes Studentore, Fatmir Xhafaj, e i sa e sa të tjerëve, oficerë sigurimi, persekutorë e vrasës të genit më të mirë të këtij kombi”, u shpreh nënkryetari i grupit të PD- së. Pas kësaj deklarate ka reaguar Kryeministri Rama, i cili e ka cilësuar provokim vendimin e Këshillit Bashkiak të Hasit. “Kryeministri Edi Rama shpreh keqardhjen për sulmet e shëmtuara ndaj tij, lidhur me një vendim të Këshillit Bashkiak të Hasit, me të cilin ai jo vetëm s’ka asnjë lidhje, por e konsideron një provokim të pa- përgjegjshëm, të kujtdo që e ka propozuar dhe ka miratuar. Ai bën me dije se i ka kërkuar prefektit të Kukësit refuzimin e firmosjes së atij vendimi, ndërkohë që sot në mbledhjen e grupit parlamentar e ka dënuar këtë shfaqje të shëmtuar papërgjegjshmërie të këshilltarëve të Hasit, pavarësisht se në Këshillin Bashkiak të Hasit Partia Socialiste ka vetëm një këshilltar, i cili nuk ka votuar pro vendimit”, thuhet në deklaratën e shpërndarë nga Kryeministria. Ai i cilësoi vulgare akuzat e PD- së. “Duke i konsideruar akuzat vulgare të Partisë Demokratike, si një shpërdorim politik të radhës së emrit e të kujtimit të Azem Hajdarit, Kryeministri Edi Rama shpreh bindjen se ato s’janë asgjë tjetër veçse ana tjetër e medaljes së këtij episodi të politikës qorre e shurdhe të interesave më të ulëta”, reagoi Kryeministri. Por pas kësaj deklarate, PD- ja reagoi duke i kërkuar Kryeministrit shkarkimin e kryetarit të bashkisë. “Firma e prefektit nuk është zgjidhja! Është vetëm një mjet që Edi Rama të mos marrë përgjegjësi! Edi Rama nuk mund të lajë duart si Ponc Pilati dhe të fshihet pas prefektit, sepse kryetari i Bashkisë së Hasit është i tiji, se ai ishte në dijeni të propozimit të kryebashkiakut të tij dhe, mbi të gjitha, Edi Rama ka në dorë ta shkarkojë atë”, thuhet në deklaratën e dytë të PD- së.