Rama, akuza PD: Parti që flet me gjuhën e dhunës
Reagon Basha: E afërt është dita kur këto zullume do ta zënë poshtë
Kryeministri Rama akuzoi opozitën se e ka kthyer debatin parlamentar në një betejë të dhunshme fizike.
Pas debateve dhe tensioneve në komisionin parlamentar të medias, kreu i qeverisë reagoi në “Facebook” përmes një statusi, ku nuk kurseu dhe ironinë për Partinë Demokratike. “Një parti e zbrazur mendërisht e politikisht ( se shpirtërisht ka firuar me kohë), por e angazhuar fizikisht, e ka kthyer debatin parlamentar në një teatër gjuhësh e gjymtyrësh të dhunshme! Pse mos u japim një leje ndërtimi te SHQUP- i për Kullën e Sporteve Trup me Trup?”, shkruan Rama. I menjëhershëm ishte reagimi i kryetarit të Partisë Demokratike, Lulzim Basha. Përmes një deklarate për mediat, Basha akuzon Kryeministrin se akuzon opozitën me gjuhën e një batakçiu. Sipas tij, beteja e opozitës në komision ishte në mbrojtje të parlamentarizmit. “Sot, opozita mbrojti interesin publik dhe parlamentarizmin. Parlamenti duhet të përfaqësojë interesat e popullit dhe jo të mafias së ndërtimit, krimit dhe drogës. Por Edi Rama e ka të vështirë të bëjë dallimin midis batakut, mes së cilit kalon gjithë kohën dhe Parlamentit, prandaj edhe komentet e tij publike janë të gjitha me gjuhën e batakçiut”, shprehet Basha. Kreu i Partisë Demokratike akuzoi Kryeministrin Rama se përmes projektit të teatrit të ri, kërkon të vjedhë pronën publike për të ndërtuar kulla me paratë e ardhura nga trafiku i drogës. “Afera e Teatrit Kombëtar është grabitje kriminale që Edi Rama ka më se një vit që e përgatit në bashkëpunim me klientët e tij. Në këtë aferë do të vidhet prona publike për të ndërtuar kulla të larta që do financohen me para të krimit dhe drogës. Ky që garantoi karrierën me 20 për qindëshin për çdo leje ndërtimi dhe u ngrit në majë të politikës me formulën ‘ një pallat, një votë’, tani sillet si një bandit që do të grabisë 100 për qind të Shqipërisë”, shprehet Basha në reagimin e tij. Sipas tij, qëllimi i Kryeministrit është mbajtja e pushtetit duke bashkëpunuar me oligarkë dhe kriminelë. “I dështuar në qeverisje, i demaskuar para gjithë botës si i paaftë, i korruptuar dhe i kal- bëzuar moralisht, Edi Rama kërkon ngushëllim dhe mbrojtje duke u bërë njësh me oligarkë, kriminelë dhe hajdutë për të mbrojtur pushtetin dhe bërë para duke betonizuar dhe grabitur Shqipërinë”, shprehet Basha. Kreu i opozitës akuzon Kryeministrin Rama si dhunues të Parlamentit, Kush- tetutës dhe ligjit, ndërsa e paralajmëron se do jenë zullumet e tij që do ta zënë poshtë. “Dhunuesi i Parlamentit, Kushtetutës dhe ligjit është Edi Rama. Dhunuesi i shqiptarëve është Edi Rama që, pasi u vodhi votën, po vjedh edhe pasurinë publike për të shtuar pasurinë e vet private. Dhunuesi i Shqipërisë është Edi Rama, që po na mbyll derën e Europës për të pestin vit me radhë. Sot, ai mund të ngrejë kulla dhe të pastrojë paratë e drogës në çdo cep të Tiranës, por e afërt është dita kur këto zullume do ta zënë poshtë bashkë me Fikun e Tiranës!”, përfundon reagimin e tij kreu i opozitës.