Shkup, Kuvendi miraton emrin e ri të republikës
“Marrëveshja nuk i lumturon shqiptarët, ka konotacione etnike”
Me një mbështetje të vogël në Kuvendin e Maqedonisë, të martën u miratua marrëveshja me Greqinë për ndryshimin e emrit të republikës. Gjithsej votuan 109 deputetë, nga 120 që ka kjo legjislaturë.
Marrëveshja për emrin u mbështet nga 69 prej tyre, ndërsa edhe 40 votuan kundër. Deputetët e VMRODPMNE- së kanë thirrur kundër marrëveshjes, duke e quajtur atë shantazh. Protesta nga qytetarët janë mbajtur jashtë Kuvendit të Maqedonisë gjatë gjithë kohës që është zhvilluar seanca plenare. Një kopje e marrëveshjes është djegur nga protestuesit. Procesi zgjati më shumë se pesë orë. Pas miratimit në Kuvend, marrëveshja kaloi në Komisionin për Çështje Europiane, duke i hapur rrugën ratifikimit të saj në Kuvend, i cili pritet të mbahet sot. Projektligji ka kaluar me nëntë vota pro, asnjë kundër dhe asnjë të përmbajtur. Në seancën e Komisionit nuk morën pjesë deputetët e VMRO- së. Kryeministri i vendit, Zoran Zaev, tha se pas marrëveshjes me Bullgarinë, është arritur marrëveshje dinjitoze edhe me Greqinë, duke mbyllur çështjen e fundit që pengonte rrugën e Maqedonisë në aspiratat euroatlantike. Zaev kujtoi se: “Qytetarët do ta japin fjalën e fundit në referendum lidhur me Marrëveshjen me Greqinë, por pres vetëdije shoqërore dhe të gjithë të qëndrojmë pas zhvillimit të Maqedonisë dhe të vazhdojmë edhe më aktivisht të ecim para”. Sipas tij, marrja e datës për fillimin e negociatave me BEnë do të jetë motiv më shumë në qasjen energjike reformuese të Qeverisë. Ndërkohë, eksperti i rrethanave historike e politike në Maqedoni, Agim Vinca, tha se emri “Republika e Maqedonisë së Veriut”, nuk është një emër që i bën të lumtur shqiptarët. “Ky nocion gjeografik ka konotacione etnike, kur thuhet sot Maqedoni, nënkupton maqedonasit si etnikë dhe shqiptarët nuk pranojnë ta quajnë veten maqedonas. Përkundër arritjes së pajtimit, ky proces duhet të kalojë edhe në faza tjera, deri sa vendimi për emrin të jetë fuqiplotë...”.