Senegali e bën festë, samurajtë godasin Kolumbinë
Kagaua nuk fal nga 11 metra, Osako bën surprizën
Nuk mund të bënte ndryshe edhe Grupi H në Botërorin "Rusi 2018", pa startuar me surprizë.
Në Saransk, Japonia ka mposhtur 2- 1 Kolumbinë në një ndeshje të kondicionuar nga dalja me karton të kuq e Sançez- it në të 4- n minutë. Aziatikët gjetën shpejt avantazhin me penalltinë e shndërruar në gol nga Kagaua, por barazimi vendoset me një ekzekutim mjeshtëror të goditjes së dënimit nga Kuintero në të 39- n minutë. Në pjesën e dytë, Japonia ka humbur disa raste për shënim, por në të 73- ën gjen golin e dytë pas një goditjeje me kokë nga Osako, për 3 pikë.
Ndeshja - Që në start disa aksione sulmuese, deri në momentin kur pas gabimit në prapavijë, ndërhyrja e Ospinës u pasua nga një prekje me dorë e Karlos Sançez- it, i cili merr të parin karton të kuq në "Rusi 2018". Kagaua tregohet i saktë dhe për japonezët nis festa në Saransk.
Ndryshimet - Kolumbia vuan shumë dhe Pekerman është i detyruar t'i bëjë llog- aritë me 4- 4- 1 pas daljes së Sançez- it, që i hap jo pak probleme taktikisht. Për disa minuta, konfuzioni i Kolumbisë i jep shanset kundërshtarit që të krijojë rast për 2- 0. Pas së 30- ës minutë, Pekerman detyrohet të nxjerrë Kuadradon për Barrios, në mënyrë që të rikthejë balancat e skuadrës në mesfushë. Një goditje dënimi në fundin e pjesës së parë, e ekzekutuar tokazi, sjell barazimin për Kolumbinë. Në të dytën, Pekerman kishte këshilluar të tijtë që t'ia linte Japonisë zotërimin e topit. Për shumë minuta rezultoi me sukses, duke tentuar kundërsulmin, por inferioriteti numerik u ndie edhe në një goditje nga këndi, kur Osako gjeti topin brenda zonës dhe me kokë shënoi golin e fitores.
POLONI- SENEGAL
Larg parashikimeve dhe kundër pritshmërive. Botërori "Rusi 2018" vijon me surprizat. E radhës ka qenë ndeshja e dytë e Grupit H, ku Senegali ka triumfuar përballë Polonisë me rezultatin 1- 2. Një devijim i Sionek ka dhuruar golin e parë për Senegalin në të 38- ën pas gjuajtjes së Gueje. Në pjesën e dytë, një top i kthyer pas nga Krishoviak shndërrohet si "asist" në mesfushë për Niang, që arrin të shënojë dhe në fund, vetë Krishoviak përmirëson statistikat për Poloninë. Senegalezët, me fitoren e ar- ritur në start të Botërorit, regjistrojnë të parën fitore të skuadrave afrikane, pas humbjeve në debutim nga Egjipti, Maroku, Nigeria dhe Tunizia. Në fillim pritej shumë dueli në distancë mes Levandovskit dhe Manesë, por Niang është bërë protagonist. Iniciator i golit të parë dhe i mrekullueshëm me vrapimin në momentin e golit të dytë. Me gjithë punën e mirë të trajnerit Sise dhe të tijve në fushën e lojës, polakët kanë qenë jo pak "zemërmirë" me gafat dhe gabimet që kanë bërë. Në sfidën e radhës për Grupin H, Japonia e Senegali duket se kanë një përballje, që mund të prishë jo pak planet e dy të tjerave në duelin për kreun.