Champions, Kukësi me fat, "peshkon" kampionët e Maltës

Kukësit i buzëqesh fati në turin e parë të Ligës së Kampioneve, teksa "peshkon" klubin maltez, Valeta. Goglat në Nion të Zvicrës i kanë rezervuar ekipit të Peter Pakult një sfidë me kampionët e Maltës, që në krahasim me rivalët e tjerë të mundshëm, duket ndoshta më i kalueshmi. Përpara se UEFA të hidhte shortin, skuadrat ishin ndarë në grupe në bazë të koeficientit që kanë, duke u cilësuar si favorite dhe jofavorite. Kukësi do të kishte kundërshtar një mes klubeve si Spartak Trnava ( Sllovaki), Valeta ( Maltë), Alashkert ( Armeni), Sutjeska Nikshiq ( Mal i Zi), Spartaks Jurmala ( Letoni) dhe Flora Talin ( Estoni). Nga këto klube, Kukësi ishte përballur më parë vetëm me estonezët, madje duke debutuar në Kupat e Europës me një barazim 1- 1 në Talin, që i hapi rrugën kalimit historik të tri tureve radhazi. Gjithsesi, te Kukësi duhet të ndihen me fat, sepse kanë "peshkuar" një rival të kalueshëm, nisur edhe nga niveli i kampionatit maltez. Në një kompeticion si Champions, kurrë nuk mund të bëhen llogari, pasi surprizat nuk mungojnë që në turet e para, por skuadra e Pakult, nisur nga kundërshtari që ka përballë, s'duhet ta diskutojë kalimin e turit. Ndeshjen e parë, Kukësi do ta luajë si pritës në stadiumin "Loro Boriçi" të Shkodrës. UEFA ka përcaktuar datat 10 dhe 11 korrik për takimet e para, ndërsa ato të kthimit më 17 dhe 18 korrik. Kjo është hera e dytë që Kukësi merr pjesë në Ligën e Kampioneve, me ndryshimin se këtë edicion nuk vjen si fitues i titullit, por vendi i dytë në kampionat për sezonin 2017- 2018. Verilindorët janë në Champions në vend të Skënderbeut, që UEFA e ka dënuar me 10 vite përjashtime nga kompeticionet europiane. Në edicionin e kaluar, Kukësi debutoi në Champions kundër moldavëve të Sherif Tiraspol, duke fituar 2- 1 në "Elbasan Arena", por ky rezultat nuk mjaftoi për kualifikimin.

AGOLLI SI RIVAL

UEFA shortoi dje edhe çiftet e turit të dytë të Ligës së Kampioneve, që do të përcaktohen pas përfundimit të turit të parë. Në rast kualifikimi ndaj maltezëve të Valetës, atëherë Kukësi do të luajë në turin e dytë me fituesin e çiftit Olimpija Ljubljana- Karabak. Pa dyshim, klubi azerbajxhanas ku bën pjesë prej shumë vitesh kapiteni i Kombëtares, Ansi Agolli, është favorit për këtë takim dhe nuk përjashtohet mundësia që të kemi një përballje Karabak- Kukësi. Megjithatë, duhen pritur ndeshjet e turit të parë, me Kukësin që ka detyrim kualifikimin. Në rast se skuadra e Pakult dështon, atëherë ka edhe një shans tjetër, këtë herë në turin e dytë të Ligës së Europës. Misioni Champions ka nisur dhe Kukësi do të tentojë që përmes kualifikimeve në këtë kompeticion, të kapë grupet e Ligës së Europës.