Mbështetje për Merkelin nga Uashingtoni?
Jemi mësuar me kaq shumë gjëra, sa edhe sulmi i fundit me “Twitter” i Donald Trumpit, në fakt, nuk shokon askënd në Gjermani: Presidenti i SHBA- ve bëri të ditur përmes rrjetit të “Twitter”- it se gjermanët, për shkak të politikës së migrimit, “po i kthejnë kurrizin një koalicioni qeveritar tashmë të dobët”. Dhe më tej: “Kriminaliteti po rritet në një shkallë të lartë në Gjermani”. Kjo e fundit është gënjeshtër e pastër, por me siguri është pjesë përbërëse e mesatarisht çdo tweet- i të Trumpit.
NË KUNDËRSHTIM ME TË GJITHA RREGULLAT DIPLOMATIKE
Retorika agresive ndjek një model të qartë: Trumpi e ka përcaktuar Angela Merkelin si armiken e tij kryesore në Europë. Ndoshta, sepse ajo as u përpoq që të sillej me lajka me të, siç bëri Presidenti francez Emmanuel Macron. Ose sepse ajo kuptohej mirë me Barack Obaman, vetëm kjo mjafton për të ndezur zemërimin e Presidentit të SHBA- ve. Në mënyrën se si e trajton Trumpi Merkelin ( dhe me të Gjermaninë) bën pjesë dërgimi i Richard Grenellit, ambasadorit të ri të SHBA në Berlin, i cili fare hapur deklaron se do të mbështesë populistët në Europë. Një tejkalim i ulët kompetencash i të gjitha rregullave diplomatike. Dhe tweet- i i Trumpit vazhdon pastaj me një nivel të pashembullt për një President amerikan: Europianët, - shkruan Trump,- kanë bërë gabimin që pranuan miliona vetë, të cilët e kanë ndryshuar dukshëm kulturën e tyre. Dhe më tej: “Ne nuk duam që të na ndodhë e njëjta gjë përmes imigrimit”.
Dhe kjo thuhet për Amerikën, vendin ku më parë strehoheshin njerëzit në hall nga e gjithë bota, për kazanin e shkrirjes së kulturave, për këtë vend të fantazisë, i cili ka qenë për njerëzit ambiciozë nga Europa për dekada vendi ku mund të ecje me punë - pavarësisht nga origjina ose statusi social. Vetëm po ta doje këtë dhe po të përvetësoje optimizmin amerikan. Prej këtyre amerikanëve, gjermanët, fillimisht të Perëndimit, morën pas 1945- s, si të thuash, si dhuratë demokracinë dhe sundimin e ligjit. Tani të gjitha këto bëhen pre e tërbimit të këtij njeriu të egër në Uashington. Të mbushen sytë me lot.
GJERMANIA DHE AMERIKA - NJË RAPORT AMBIVALENT
Por sulmet e Trumpit ndaj qeverisë gjermane janë jo vetëm të paturpshme, por edhe të pamenduara: sepse raporti i ngushtë i gjermanëve ndaj Amerikës gjithmonë është edhe ambivalent. Dhëniet e mësimit nga Uashingtoni nuk janë pritur asnjëherë mirë në Gjermani, aq më pak nga ky President. Politika krahasimisht liberale e Merkelit ndaj refugjatëve, ndërkohë shihet në mënyrë kritike nga shumica e gjermanëve ose refuzohet hapur, për këtë nuk të duhet të jesh populist i djathtë. Por mbështetja e krahëve nga burri që ka humbur rrugën në Shtëpinë e Bardhë për kundërshtarët e Merkelit më shumë do të ndihmojë Kancelaren.
Ndoshta, tweet- i i Trumpit, i lëshuar si gjithmonë herët në mëngjes para ngrënies së mëngjesit, gjithsesi, sërish i drejtohet popullit të tij, njerëzve në Amerikë, të cilët Trumpi kërkon t’i mobilizojë para zgjedhjeve që zhvillohen edhe atje. Për këtë, ai e ka të lehtë të marrë rolin e mësuesit ndaj aleatëve në Berlin. Sepse për këtë President nuk ka më aleatë, gjithsesi jo në Berlin.