Presidenti i KE flet për kamp në Shqipëri, Majko: Nuk mbajmë dot 600 mijë refugjatë
"Shqipëria nuk është ' epruvetë', ku paaftësitë dhe interesat politike të gjejnë justifikim me ' eksperimente' të tilla"
Ministri i Diasporës, Pandeli Majko, reagoi dje ndaj deklaratave të zv. ministrit të Brendshëm, Julian Hodaj, për mundësinë e pritjes së 600 mijë refugjatëve nga Siria. Sipas ish- Kryeministrit gjatë kohës së krizës humanitare me refugjatët e luftës nga Kosova, nëse hapja e negociatave me BE kushtëzohet me kërkesën për pritjen e mijëra refugjatëve nga Siria apo vendet në konflikt, BE nuk na duhet fare. Krizën e refugjatëve Majko e sheh si dështim të politikanëve perëndimorë, duke i dhënë Rusisë dhe Iranit mundësinë për të përdorur refugjatët sirianë si "bombë njerëzore" ndaj strukturës europiane, e cila do të krijonte një konflikt mes europianëve dhe sirianëve. Majko e cilëson Shqipërinë si shtëpinë e zotit dhe të mikut, por jo të kthehet në një epruvetë, sipas tij, ku të provohen paaftësitë dhe dështimet e të tjerëve. Sipas tij, grumbullimet e refugjatëve në sasi sfiduese, për vendësit do të krijojë situatë shpërthyese, për të cilën duhet të bëhen mirë llogaritë. Për ministrin e Diasporës, Brukseli nuk mund t'i kërkojë një vendi dhe populli ndryshimin e strukturës së vet sociale, duke vënë në diskutim sigurinë e tij kombëtare dhe më gjerë. Prandaj, ai ngre disa pyetje nga Brukseli në emër të shqiptarëve: "Pse diçka që nuk është e mirë për Europën, është e mirë për Shqipërinë?!" Dhe më ironikja vjen më pas: "Nëse na kërkoni diçka që nuk e bëni vetë, a na bën kjo më europianë apo e kundërta?", përfundon Pandeli Majko reagimin e tij.
Shqipëria do të ishte e gatshme të ndajë peshën e çdo krize me familjen e vet europiane, por shqiptarët nuk janë njerëz naivë. Ata dyshimin e tyre do ta fillonin me pyetje të thjeshta… "Pse diçka që nuk është e mirë për Europën, është e mirë për Shqipërinë?!"