SEJKO: RRITJA EKONOMIKE ËSHTË NË TRAJEKTORE POZITIVE
Guvernatori i Bankës së Shqipërisë, Gent Sejko, zhvilloi dje një takim me ambasadoren franceze në vendin tonë, Christina Vasak, dhe shefin e Sektorit Ekonomik Rajonal, Jean- Marie Demange. Guvernatori i Bankës së Shqipërisë i prezantoi ambasadores franceze zhvillimet ekonomike në vend, ku theksoi se rritja ekonomike është në trajektore pozitive zhvillimi dhe balancat kryesore ekonomike pritet të forcohen në vitet e ardhshme. Lidhur me sistemin financiar, guvernatori Sejko u shpreh se ai karakterizohet nga nivele të kënaqshme kapitalizimi dhe likuiditeti. Guvernatori u ndal gjithashtu në panoramën e sektorit bankar, ku veçoi dy elemente kyçe: rritjen e kreditimit dhe përmirësimin e treguesit të kredive me probleme. Ai u shpreh se nxitja e mëtejshme e kredisë për ekonominë dhe zbatimi i planit për trajtimin e kredive me probleme mbeten në fokusin e Bankës së Shqipërisë. Plani ndërinstitucional, i ndërmarrë me qëllim uljen e kredive me probleme, ka dhënë efekte pozitive, duke bërë që raporti i kredive me probleme ndaj kredisë totale të zbresë. Gjatë takimit u diskutua gjithashtu lidhur me rolin mbikëqyrës të Bankës së Shqipërisë, me qëllim forcimin e qëndrueshmërisë së sistemit, në kuadër edhe të parandalimit të pastrimit të parave dhe financimit të terrorizmit. Guvernatori theksoi se ky është një proces mjaft i rëndësishëm dhe se institucionet në vend po bashkëpunojnë nëpërmjet shkëmbimit të informacionit, duke synuar forcimin e përqasjes së mbikëqyrjes së bazuar në rrezik.