Meta: Hungaria të ndihmojë për arritjen e konsensusit me vendet e BE
Presidenti Ilir Meta ishte dje në një vizitë zyrtare në Hungari, ku u prit nga homologu i tij Janos Ader. Gjatë takimit me kreun e shtetit hungarez, Ilir Meta ka kërkuar mbështetjen e Hungarisë për çeljen e negociatave për Shqipërinë. Kreu i shtetit shqiptar është shprehur besimplotë se Hungaria do të japë mbështetjen e saj dhe të ndihmojë Shqipërinë që të arrijë konsensusin e vendeve të BEsë për hapjen e negociatave. “Një vëmendje shumë të veçantë ia kushtuam edhe plotësimit të kushteve nga Shqipëria për çeljen e negociatave të anëtarësimit në Bashkimin Europian. Jemi të ndërgjegjshëm se kjo nuk është periudha më e mirë për Bashkimin Europian, por shpresojmë se në fund të këtij muaji të gjitha vendet anëtare të saj do të mbështesin çeljen e negociatave të anëtarësimit për Shqipërinë. E falënderova Presidentin Ader dhe qeverinë hungareze për mbështetjen e vazhdueshme e të qartë, që na ka motivuar më shumë për të vijuar në rrugën e mundimshme të reformave. Besoj se Hungaria do të kontribuojë në arritjen e konsensusit të nevojshëm brenda BE- së në këtë drejtim”, është shprehur Meta. Sipas Presidentit, pjesë e diskutimeve ishin dhe zhvillimet në rajon dhe forcimin e bashkëpunimit. “Sigurisht që diskutuam edhe mbi zhvillimet e përgjithshme në rajonin e Ballkanit Perëndimor dhe frymën e re të bashkëpunimit që po forcohet dita- ditës në këtë rajon. Vlerësova gjithashtu rolin e madh që Hungaria ka luajtur edhe në kuadër të Grupit të Vishegradit V4, veçanërisht gjatë mbajtjes së Kryesisë së radhës 20172018”, ka thënë ai.
EKONOMIA Gjatë konferencës së për- bashkët, Presidenti Ilir Meta ka folur dhe për rritjen e bashkëpunimit ekonomik mes dy vendeve. “Vlerësuam se mundësitë e bashkëpunimit ekonomik janë ende të pashfrytëzuara sa duhet dhe vëllimi i shkëmbimeve tregtare është ende modest dhe larg potencialeve të të dyja vendeve.
Një rol shumë pozitiv në këtë drejtim po luan rivendosja e linjës ajrore direkte midis kryeqyteteve tona, si dhe funksionimi i dhomës hungareze të tregtisë në Tiranë ( Hungarian National Trading House). Linja ajrore pothuaj e ka trefishuar brenda një viti numrin e hungarezëve që kanë vizituar Shqipërinë, si dhe i ka dhënë një mundësi më të madhe ko- munikimit e kontakteve të drejtpërdrejta midis sipërmarrësve të të dyja vendeve”, ka thënë Presidenti shqiptar. Nga ana e tij, Presidenti hungarez Áder e siguroi Metën për mbështetjen e Hungarisë, si në drejtim të integrimit europian, ashtu edhe për nxiten e mëtejshme të bashkëpunimit ekonomik midis dy vendeve.