Ekspertiza për të riun që vdiq në Komisariat: Shkaqe natyrale
KORÇE - Përfundimi i ekspertizës mjeko- ligjore për vdekjen e Enea Ftojit hedh poshtë pretendimin e familjarëve, duke nënvizuar se vdekja ka ardhur për shkaqe natyrale. 27- vjeçari ndërroi jetë rreth një muaj më parë në ambientet e Komisariatit në Korçë, ndërsa familjarët treguan shenjat e dhunës në trupin e tij. Në përfundimet e ekspertizës thuhet se, në trupin e viktimës nuk ka pasur shenja dhune dhe as trauma të brendshme të shkaktuara nga dhuna fizike. Nga ana tjetër, theksohet se vdekja ka ardhur për shkaqe natyrore dhe konkretisht nga çarja e aortës. Familjarët e Enea Ftojit jo vetëm e kanë kontestuar këtë përfundim, por ata kanë deklaruar se do të kërkojnë një akt riekspertimi dhe zhvarrosjen e 27- vjeçarit. “Djali im kishte shenja dhune, e kam parë vetë. Djali është dhunuar në një ambient publik, ku e panë të gjithë dhe është dhunuar brenda komisariatit, sepse na e tha me gojën e tij. Kur e morëm në shtëpi të vdekur, e pashë me sytë e mi. Nuk e pranoj për asnjë lloj arsye që ndaj tij nuk është ushtruar dhunë nga Policia. Unë do kërkoj që ai të zhvarroset dhe t’i bëhet një tjetër aktekspertimi, me të tjerë ekspertë. Në rast se edhe këtë herë nuk del e vërteta, do bëj vetëgjyqësi”, shprehet babai i viktimës, Tomor Ftoj. Nga ana tjetër, në një komunikatë të shpërndarë nga Policia e Shtetit, thuhet se, zv. ministrja e Brendshme, Romina Kuko, dhe drejtoresha e SHÇBA, Anila Trimi, kanë bërë një vizitë në familjen e të ndjerit për t’u ofruar atyre mbështetje. Por vetë familjarët e mohojnë faktin që të jenë vizituar dje nga zv. ministrja apo qoftë ndonjë përfaqësues tjetër i shtetit. Sipas tyre, kjo vizitë është bërë pak ditë pas ngjarjes. “Nuk dija gjë që kishte dalë akti i ekspertimit. Askush nuk na ka thënë gjë. Tani që mësova se e kanë mohuar dhunën, është sikur ma vranë përsëri”, shprehet nëna, Mimoza Ftoj. dh. ç