Kompensimi, sa para marrin pronarët dhe të përndjekurit
Zbardhen shifrat e kompensimit. Qeveria do ndajë 37 milionë USD për ish- pronarët dhe 18 milionë USD për ish- të përndjekurit
Qeveria parashikoi në buxhet për vitin 2018 të shpërndajë 4 miliardë lekë për kompensimin e pronarëve dhe 2 miliardë lekë për dëmshpërblimin e ish- të përndjekurve. Arkëtimet nga legalizimet parashikohen në vlerën e 1,5 miliardë lekëve, fond i cili shpërndahet për kompensimin e pronarëve.
Për 4 muajt e parë të vitit shpenzimet e qeverisë për dëmshpërblimin e ish- të përndjekurve dhe pronarëve janë nga 7 deri 8 për qind të fondit të miratuar në buxhet për këto kategori. Gazeta boton tabelën me të dhënat zyrtare të qeverisë për fondin e shpërndarë deri tani për ish- të përndjekurit dhe pronarët dhe pjesa e mbetur e fondit për t’u shpërndarë deri në dhjetor 2018. Duke iu referuar të dhënave fiskale të 4- mujorit të këtij viti, të publikuara nga Ministria e Financave për kompensimin e fondit të pronarëve , qeveria ka shpenzuar 322 milionë lekë apo 8 për qind të fondit prej 4 miliardë lekësh. Deri në fund të vitit fondi i mbetur, referuar të dhënave fiskale që do të shkojnë për kompensim, është rreth 3,7 miliardë lekë. Me buxhetin e vitit 2018, vlera e kompensimit të ish- pronarëve është 4 miliardë lekë nga 3.8 që ishte për vitin 2017. Fondi parashikohet të jetë me rritje më të ndjeshme për vitet në vijim, pasi skema e kompensimit të pronave me ligjin në fuqi parashikon rritje progresive të buxhetit deri në vitin 2028, vit kur pritet të përfundojë procesi i kompensimit. Sipas programit buxhetor afatmesëm 2019- 2021, për vitin 2019 parashikohet që për kompensimin e pronarëve të përdoren 5 miliardë lekë dhe 5.5 miliardë në 2020. Në bazë të ligjit të ri, qeveria shqiptare parashikon që të përmbyllë procesin e kthimit dhe kompensimit të ish- pronarëve brenda 10 viteve. Për dëmshpërblimin e ish- të përndjekurve nga fondi prej 2 miliardë lekësh, qeveria ka shpërndarë deri tani 139 milionë lekë apo 7 për qind të fondit. Kjo kategori deri në fund të vitit do të përfitojë edhe 1,8 miliardë lekë të mbetura nga fondi i buxhetit. Fondi për kompensimin e ish- të përndjekurve në vlerën e 2 miliardë lekëve ka mbetur i pandryshuar në krahasim me 2017. Në total, të ardhurat e mbledhura nga legalizimet parashikohen në vlerën e 1,5 miliardëve lekë. Për muajt janar – prill qeveria ka arkëtuar 375 milionë lekë. Të ardhurat nga legalizimet shpenzohen për kompensimin e pronarëve. Referuar të dhënave fiskale, deri në fund të vitit qeverisë i kanë mbetur për të arkëtuar edhe 1,125 miliardë lekë, që do të përdoren për kompensimin.