Kreu i Gjykatës Kushtetuese: Vetingu, si të kapërcesh varrin për së gjalli
“Gjyqtarët e Kushtetueses duhet të zëvendësohen dhe të kalojnë në veting. Politika duhet të gjejë zgjidhje”
Kreu i Gjykatës Kushtetuese, Bashkim Dedja, ka folur publikisht vetëm disa ditë pasi kaloi me sukses procesin e vetingut.
Në një takim me gazetarë, Dedja ka thënë se situata në të cilën ndodhet Gjykata Kushtetuese në këtë moment do zgjidhje. “Reforma është e rëndësishme. Që nga muaji mars, Gjykata Kushtetuese nuk funksionon dhe politika duhet të gjejë zgjidhje për këtë”, tha Dedja, duke shtuar se anëtarët e rinj të Kushtetueses, duhet që më parë t’i nënshtrohen vetingut. Ai tha më tej se ka qenë një nga mbështetësit e Reformës në Drejtësi dhe nuk ka patur dyshime për domosdoshmërinë e saj. “Ne si Gjykatë e kemi mbështetur vetingun dhe jemi shprehur për domosdoshmërinë e tij, konform rekomandimeve të Komisionit të Venecias”, tha Dedja. Ai më pas foli për ritmet, me të cilat po ecën Reforma në Drejtësi. Deri më tani, 16 subjekte i janë nënshtruar vetingut dhe për Dedjen, ritmet janë normale. “Besoj që ritmet janë normale. Shpresoj që ritmet të jenë më të shpejta dhe natyrisht që lista prioritare që ka të bëjë me KLGJ- në dhe KLP- në, Inspektorati i Lartë i Drejtësisë dhe Këshilli i Emërimeve në drejtësi, që janë institucionet bazë të Reformës së Drejtësisë, pra kjo listë prej gati 57 personash të mbarojë sa më shpejt”, shtoi kreu i Kushtetueses. Ai e konsideron ligjin si një prej më të ashpërve në vend, duke shtuar se me rëndësi është që vendimmarrja është e shqiptarëve. “Vetingu është një ndër ligjet më të ashpra që ne kemi. S’di të them nëse fajin e kanë ndërkombëtarët, politika apo dikush tjetër, por kjo situatë ku jemi, do zgjidhje. Ndërkombëtarët janë ndihmues, por vendimmarrës janë shqiptarët”, tha ai. Kreu i Kushtetueses u ndal edhe te rasti i tij, ku nga relativi i çështjes në Komisionin e Pavarur të Kualifikimit u duk sikur ishte drejt shkarkimit. Pas se- ancës së vendimit, avokati i tij, Maks Haxhia, hodhi akuza ndaj relatores së çështjes. “S’dua të komentoj rastin tim, pasi do të ndikonte në vendimmarrjet e komisionit të Vettingut, por avokati im, në qoftë se e vlerëson që ka shkelje, do të ndjekë hapat ligjorë. Të kalosh vetingun në Shqipëri me këtë ligj, është si të kapërcesh varrin për së gjalli. Kjo është një gjë shumë e mirë, sepse njëherë e mirë ndahet elementi që ia ul vlerat kësaj reforme”, tha Dedja. VETINGU
Bashkim Dedja u bë javën e shkuar subjekti i tetë i drejtësisë, që kaloi me sukses vetingun dhe anëtari i dytë i Kushtetueses që kalon filtrat e reformës, pas Vitore Tushës. Më parë kanë “mbetur” Fatmir Hoxha, Altina Xhoxhaj dhe Fatos Lulo nga Kushtetuesja. Dedja u përball me KPK- në dhe sipas hetimit administrativ, kishte paqartësi mbi pasurinë. Ai nuk ishte i pranishëm, por u përfaqësua në seancë nga avokati i tij, Maks Haxhia. Sipas KPK- së, Dedja kishte paqartësi dhe në deklaratat e pasurive. Ato kishin të bënin me huat për blerjen e një apartamenti në Tiranë, me sipërfaqe 146 metra katrorë. Për këtë, Dedja kishte deklaruar se ka marrë një kredi prej 120 mijë eurosh me afat 20 vjet. Gjithashtu, si burime për blerjen e apartamentit, ai ka deklaruar 35 mijë euro kursime dhe dy hua pa interes në vlerën totale prej 25 mijë eurosh, të marra nga vëllai dhe kunati i tij. Mirëpo, sipas KPK- së, me këto hua kishte paqartësi. Së pari, pjesa e huas prej 15 mijë eurosh pa interes që vëllai i tij i ka dhënë Bashkim Dedjes sipas deklarimeve të tij, ishte e dyshimtë, pasi në të njëjtën kohë, ai ka marrë edhe një kredi prej 42 mijë eurosh për blerjen e një apartamenti. Mirëpo, nga dokumentacionet që paraqiti avokati Maks Haxhia, rezulton se vëllai i gjyqtarit nuk ka marrë kredi, por ka lënë si kolateral një apartament të tijin me vlerë 42 mijë eurosh për kredinë për strehim të nipit të tij.