Hapja e negociatave, Xhafaj merr mbështetje në Gjermani
Seehofer: I kam dhënë dritën jeshile Kancelares për Shqipërinë
Ministri i Brendshëm, Fatmir Xhafaj, mori dje mbështetjen e aleatit të Kancelares Merkel në koalicionin qeverisës për hapjen e negociatave të Shqipërisë me BE- në.
Në Berlin, Xhafaj u prit nga homologu i tij, ministri i Brendshëm Federal i Gjermanisë, Horst Seehofer. Takimit të delegacioneve përkatëse, i parapriu një bisedë kokë më kokë e të dy ministrave. Seehofer, në cilësinë e ministrit të Brendshëm Federal, por edhe si president i Partisë CSU, deklaroi se “i ka dhënë dritën jeshile Kancelares Federale dhe Ministrisë së Jashtme për hapjen e negociatave të Shqipërisë me BE”. Në referim të mbështetjes së vazhdueshme të Gjermanisë ndaj vendit tonë, ministri Xhafaj evokoi veprimtarinë e ish- Kryeministrit të Bavarisë, Franz Josef Strauss, i cili, rreth 35 vjet më parë, bëri përpjekje për t’ i hapur Shqipërisë një dritare drejt Europës. “Sot, me progresin e gjithanshëm, është momenti i duhur që Gjermania të jetë në pararojë të shteteve që mbështesin Shqipërinë në rrugëtimin e saj për t’iu bashkuar familjes europiane”, u shpreh ministri Xhafaj. Më tej, ministri Xhafaj u ndal te problematikat që lidhen me luftën kundër terrorizmit, ekstremizmit të dhunshëm dhe radikalizmit. Ministri Seehofer shprehu, veç të tjerash, interes në lidhje me Reformën në Drejtësi dhe procesin e vetingut në Polici, duke përgëzuar për hapat që po hidhen në këtë drejtim, gjë që do të çojë në konsolidimin e sistemit të drejtësisë në vendin tonë. Ministri Xhafaj i prezantoi homologut të tij gjerman një plan me 10 pika, i cili parashikon fushat e bashkëpunimit në nivel institucional dhe operacional. Të dy ministrat ndanë të njëjtin mendim se implementimi i këtij plani do të ndikojë në konsolidimin e mëtejshëm të marrëdhënieve miqësore dhe bashkëpunimin ndërmjet dy vendeve tona. Ministri Seehofer e priti me shumë kënaqësi dhe entuziazëm këtë propozim dhe garantoi se “shumë shpejt do të njiheni me veprimet tona konkrete në lidhje me këto çështje”.