Fondi 7 milionë USD, 1147 pronarët që kompensohen
Qeveria vendos kompensimin e 1147 pronarëve. Emrat zyrtarë që marrin shtatë milionë USD në të gjithë vendin. Dokumentet që duhen
Qeveria ka miratuar kompensimin e ri për pronarët, që marrin paratë nga tokat e zëna nga ndërtimet pa leje. Gazeta boton sot emrat e 1147 përfituesve në të gjithë vendin.
Në total do të kompensohen 43,965 m ² tokë e zënë dhe pronarët do të marrin 731 milionë lekë, ose rreth 7 milionë USD. Në vendimin e qeverisë përcaktohen edhe qytetet ku janë pronarët përfitues: “Kompensimin financiar të pronarëve të pasurive të paluajtshme, pronë private, për sipërfaqet takuese, të zëna nga ndërtimet informale, në drejtoritë e ALUIZNI- t: Tiranë Veri, Tiranë Jug, Tiranë Shtesat, Kamzë Vorë, Elbasan, Durrës, Fshatra Turistikë dhe Shkodër”. Pas miratimit të vendimit nga qeveria, është Agjencia e Pronave ajo që do të hapë procedurat e aplikimit për të marrë paratë.
Dokumentet që duhen
Subjekti kërkues ( subjekti përfitues/ trashëgimtari ligjor/ përfaqësuesi me prokurë), në momentin e plotësimit të kërkesës për kompensim, duhet të paraqesë dokumentacionin e mëposhtëm:
1. Kërkesën për kompensimin e pronës, sipas formatit tip, që i vihet në dispozicion nga ATP;
2. Dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil;
3. Prokurën e posaçme, të nënshkruar nga të gjitha subjektet që përfitojnë kompen- sim, ku si tagër i nevojshëm të jetë edhe e drejta për të tërhequr vlerën financiare, në emër të tyre. ( Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet. Në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2.000 ( dymijë) lekë, pavarësisht se i përket së njëjtës pasuri të paluajtshme);
4. Vërtetimin origjinal të lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare ( IBAN), ku do të transferohet vlera financiare e përfituar;
5. Fotokopjen e dokumentit të identifikimit;
6. Mandatpagesën, që vërteton pagimin e tarifës së shërbimit në vlerën 2.000 ( dymijë) lekë.