Holanda voton kundër Shqipërisë, Xhafaj merr mbështetje në Gjermani për hapjen e negociatave
OPOZITA BLLOKON PARLAMENTIN, BASHA: NEGOCIATAT DO HAPEN ME KUSHTE, RAMA OFRON PAZAR PER 600 MIJE SIRIANE
Kryetari i opozitës, Lulzim Basha, deklaroi dje në Parlament se vendit tonë për shkak të korrupsionit të lartë negociatat do t’i hapen me një sërë kushtesh, por dhe me një mekanizëm kontrolli të shtuar.
Gjatë fjalës në Kuvend, Basha tha se ky është lajm i keq për shqiptarët dhe shkaktar për këtë është Edi Ramd dhe qeveria e tij. “Është verdikti gjerman tashmë, jo dhe vetëm i Gunther Krichbaum, as thjesht dhe vetëm i Johan David Vadeful- it, as thjesht dhe vetëm i kristiandemokratëve, por i qeverisë gjermane, i maxhorancës gjermane, konservatorë e socialistë së bashku, se Edi Rama ka gënjyer. Se Edi Rama nuk i ka bërë detyrat. Se Shqipëria nuk i ka plotësuar kushtet për hapjen e negociatave. Në këtë rezolutë, e cila do të bëhet zyrtare, javën e ardhshme të martën, për herë të parë Shqipërisë nuk i vendosen thjesht dhe vetëm kushte, por edhe një proces kontrolli që demonstron pabesueshmërinë totale ndaj çdo raportimi të bërë deri më sot nga Edi Rama apo nga hallka institucionale të blera e të korruptuara nga ai.
AKUZA “Kjo është një ngjarje dramatike për Shqipërinë”, është shprehur kreu i PD- së. Ai ka thënë në Parlament se vendimi i Gjermanisë do të ishte me i rëndë për Shqipërinë, në rast se nuk do të kishte negociuar edhe Partia Demokratike. Por kjo fjali e kreut të PD- së ka ngjallur të qeshura në sallën e Parlamentit, veçanërisht të kryetarit të Grupit të PS, Taulant Balla. Por Basha i është përgjigjur me një akuzë ndaj Ballës se ka porositur një makinë në Gjermani dhe brenda saj janë gjetur 1.5 milionë euro, para droge. “Ta kanë zbuluar ‘ Tojotën’, o zgërdhimtar, bashkë me 1.5 milionë euro të drogës brenda”, iu përgjigj Basha, Taulant Ballës. Më tej kreu i PD- së ka sqaruar qëndrimin e mbajtur me përfaqësuesit ndërkombëtarë. “Është ky qëndrim i yni, i cili të paktën ka çuar në një formulim të tillë, ku Shqipërisë nuk i thuhet një jo e prerë, por derisa të plotësohen kushtet: Derisa Saimir Tahiri të jetë aty ku e kanë vendin trafikantët e lidhur me drogën; derisa Shqipëria të mos ketë një ministër tjetër të Brendshëm, i cili harxhon gjithë ditën e tij duke mbrojtur vëllain e tij trafikant të dënuar droge dhe kokën e krimit të organizuar në Vlorë. Derisa qeveria t’i kthehet njerëzve, derisa të kemi një bashkëqeverisje me qytetarët dhe jo një bashkëqeverisje me krimin dhe oligarkët”, ka thënë ai.
AZILANTËT Më tej, Basha akuzoi Edi Ramën se po tenton të bëjë “pazar” me vendet e BE- së për të strehuar në Shqipëri 600 mijë refugjatët sirianë. “Ky tani ofron pazar që të marrë 600 mijë sirianë. 500 mijë shqiptarë i çoi refugjatë, por është gati të marrë 600 mijë sirianë. Kjo është fantazma që sillet tani nëpër Europë.
Sillet vërdallë dhe lutet që Shqipëria të bëhet kazani i plehrave të botës. Armët kimike, sillini në Shqipëri. Mbetjet dhe plehrat, sillini në Shqipëri. ISIS- in silleni në Shqipëri. Dhe tani është vetofruar për 600 mijë refugjatë sirianë. E bën me shpresën se do të blejë prapë heshtjen e Europës me refugjatë. Harroje, se koha jote ku blen heshtjen e Europës, ka marrë fund!”, ka thënë ai.