Shqiptarët e Zvicrës tërbojnë serbët, festojnë fitoren me shqiponjë
Brazili fiton, por sa shumë vështirësi për të mundur një Kosta Rikë shumë të organizuar dhe të motivuar për të mos braktisur këtë kompeticion, në të cilin katër vite më parë dhuroi surpriza. Luajtën mirë, por humbën në minutat e fundit në një ndeshje ku minutat shtesë dukeshin të pafundme. U shndërrua në një betejë ndeshja, mes tyre një shuplakë e Marselos për kundërshtarin që nuk u pa nga arbitri dhe një penalltie të akorduar dhe të mohuar me VAR. Një finale e nxehtë për një ndeshje që ishte parashikuar e tillë. Brazili shfaq potencialet e tij, por edhe këtë herë e kishte të vështirë të gjente rrugën e rrjetës. Tite tha para ndeshjes që Brazili duhet të mbrohej si ndaj Zvicrës, por të sulmonte më mirë. Pjesa e parë përfundoi pa goditje në portë dhe shihet qartazi që diçka te Brazili nuk shkon.
Gabime- Dhe jo vetëm për faktin që Kosta Rika kishte vendosur një “digë”, duke luajtur me skemën 4- 5- 1. Brazili ndryshon diçka në lidhje me sistemin e lojës nga ndeshja me Zvicrën. Kasemiro vendoset përpara mbrojtjes, ndërsa skuadra në total vendoset me sistemin 4- 3- 3. Zotërimi i topit është me shumicë nga ana e brazilianëve, por Kejlor Navas nuk vuan. Kutinjo provon në minutat e para, por godet larg. Brazili rrezikon në minutën e 13të, kur Borges futet në mes të Mirandës dhe Tiago Silvës, por goditja e tij është e gabuar. Brazili tenton të gjejë zgjidhjet për të dërguar topin në rrjetë, por shumë e vështirë. Marselo provon të thyejë shokun e tij, por Keljor Navas e ndal në fund.
Në frymën e fundit- Në pjesën e dytë panorama është e qartë. Kundërsulmet e kostarikasve bëhen më të rralla ( zotërimi i topit i pabesueshëm 72% për Brazilin). Te Brazili, Duglas Kosta zë vendin e Uillianit dhe ndryshon ritmin e lojës. Gabriel Zhezus fillimisht godet traversën me kokë, ndërsa më vonë Nejmar shpërdoron një rast të artë. “O Ney” kërkon të “vjedhë” një penallti, e cila në fillim akordohet dhe më vonë anulohet me VAR. Minutat kalojnë, gjithçka bëhet më e vështirë, por klasi fiton, edhe me pak fat. Në minutat e shtesës së stërzgjatur, Firmino pason për Zhezusin, i cili jep asist për Kutinjon dhe ai vjen me vrull duke thyer Navason. Një asist “pa dashje”, por sa shumë vlen për Brazilin. Një me zero dhe frymëmarrje e thellë. Në fundin e ndeshjes ka vend edhe për klasin e Kutinjos- Duglas Kostës dhe Nejmarit. Një kombinim i tillë sjell golin e dytë. Nejmar shënon dhe qan. Pak a shumë, si i gjithë Brazili. Kosta Rika përshëndetet me Botërorin dhe futet në listën e ekipeve të eliminuara.