Gjermania: Shqipërisë t’i hapen negociatat me kushte
“Vetingu ka nisur, por duhet edhe reformë e ligjit zgjedhor”
Grupet parlamentare të partive të koalicionit CDU/ CSU e SPD kanë formuluar qëndrimin ndaj një nisjeje të negociatave të anëtarësimit në BE me Shqipërinë.
Nisja e negociatave mbështetet, por me një sërë kushtesh. Kancelarja e Gjermanisë, Angela Merkel, do ta informojë të enjten në një deklaratë qeveritare Bundestagun për samitin e 28 dhe 29 qershorit të BE. Në këtë samit do të kërkohet konsensus për reformën e Sistemit të Përbashkët Europian të Azilit ( GEAS) dhe veçanërisht për direktivën Dublin III. Në samit do të flitet edhe për nisjen e negociatave të anëtarësimit të Shqipërisë dhe Maqedonisë me BE. Qeveria gjermane është shprehur në mbështetje të vendimit të Komisionit Europian për të çelur negociatat e anëtarësimit me Shqipërinë e Maqedoninë. Në projektrezolutën përkatëse të përgatitur, Bundestagu e mbështet qeverinë. Në projektrezolutën për Shqipërinë, Bundestagu e mbështet perspektivën e Shqipërisë për në BE dhe “vlerëson përpjekjet për reforma të Shqipërisë”. “Gjermania dhe BE kanë interes të veçantë për stabilizimin dhe marrëdhëniet e fqinjësisë së mirë në rajon”, shkruhet në projektrezolutë. “Zbatimi i reformës së gjerë në drejtësi ka nisur, vetingu po jep rezultate konkrete”. Po të zbatohet me sukses kjo procedurë, “Shqipëria do të jepte një kontribut të pashembullt paraprak”. Rëndësi të veçantë merr edhe vazhdimi i ngritjes së autoritetit për luftimin e korrupsionit dhe të krimit të organizuar ( SPAK). Por njëkohësisht, Bundestagu konstaton se me gjithë sukseset, ka ende deficite. Në këtë kuadër, projektrezoluta kujton rrethanën se “deri në mes të 2018- s duhet ta kenë kaluar procesin e vetingut më shumë se gjysma e rasteve të përcaktuara si prioritare”. Korrupsioni në të gjithë sistemin juridik vazhdon të jetë problem. “Përparime të ndjeshme janë bërë në luftimin e kultivimin dhe tregtinë me kanabis”, konstaton Bundestagu. Në projektrezolutë konstatohet vazhdimi i parregullsive në administratën publike. Citohet i Ngarkuari për Mbikëqyrjen e Shërbimit Civil në Shqipëri me shifrën 30 për qind të rasteve si punësime të kundërligjshme në administratën publike. Bundestagu konsideron “të nevojshme” zbatimin e rekomandimeve të OSBE/ ODIR- it dhe të Komisionit të Venecias të 2013 dhe 2015 për reformën e ligjit zgjedhor, “edhe nëse kjo nuk është pjesë e katalogut europian të kërkesave”. Në këtë sfond, Bundestagu gjerman është i pikëpamjes se vendimi për nisjen e negociatave me Shqipërinë duhet të merret vetëm me “kushte të formuluara qartë”. Bundestagu shpreh dakordimin që qeveria gjermane “ta miratojë një vendim të Këshillit Europian për nisjen e negociatave për anëtarësimin e Shqipërisë në BE”. Veç kësaj, në pikën 1 të projektrezolutës, Bundestagu i kërkon qeverisë që ta miratojë hapjen e negociatave për anëtarësimin e Shqipërisë në Këshillin Europian vetëm nëse janë plotësuar kushtet.