Vetingu, denoncimet nuk e “ngelin” gjyqtaren Ukperaj
KPK: 11 denoncime për Ukperajn, por jo objekt i ynë
Ditën e djeshme, në Komisionin e Pavarur të Kualifikimit ishte prezente në kuadër të vetingut gjyqtarja e Apelit të Vlorës, Brikena Ukperaj.
Seanca dëgjimore u drejtua nga kryesuesja e trupit gjykues, Xhensila Pere, ndërsa relatore ishte Etleda Çiftja dhe anëtare Valbona Sanxhaktari. Në sallën e gjyqit, si rrallëherë ishin edhe qytetarë që kanë bërë denoncime ndaj gjyqtares Ukperaj, e cila nga hetimi administrativ rezultoi e pastër dhe me shumë gjasë do të rikonfirmohet në detyrë. Sipas relatores së çështjes, Etleda Çiftja, vlerësimi për gjyqtaren Ukperaj është bërë për të tria shtyllat e vetingut: pasuria, integriteti i figurës dhe aftësitë profesionale. Sipas Çiftjes, ILDKPKI ka sjellë një raport pozitiv për gjyqtaren Ukperaj, e cila sipas këtij institucioni nuk ka pasur probleme me pasurinë dhe as ka pasur konflikt interesi. Pavarësisht kësaj, KPK ka vendosur të kryejë hetimin administrativ për pasurinë e gjyqtares, i cili ka përfshirë një apartament 106 metra katrorë, i blerë për 44 mijë euro në zonën e Selitës në Tiranë dhe një autom- jet “Mercedes Benz”. Të dyja këto pasuri janë blerë me kontribut të përbashkët me bashkëshortin e gjyqtares. Sipas KPK- së, nuk ka pasur shkelje sa i përket pasurisë nga ana e gjyqtares. Gjithashtu, relatorja Çiftja tha se raporti i DSIK- së e gjen të përshtatshme për detyrën gjyqtaren Ukperaj. Megjithatë, ajo që vlen për t’u thek- suar është një lumë denoncimesh ndaj gjyqtares, të ardhura në adresë të Komisionit të Pavarur të Kualifikimit. Bëhet fjalë për 11 denoncime nga qytetarë të ndryshëm për periudhën kohore kur Ukperaj është emëruar në Gjykatën e Apelit të Vlorës. Relatorja Çiftja tha se janë shqyrtuar 10 nga këto 11 denoncime dhe sipas saj, nuk janë objekt i Komisionit. Vetëm një denoncim është ende nën shqyrtim, pasi ka mbërritur në KPK një ditë përpara seancës.
“Kemi verifikuar me kujdes të gjitha denoncimet e ardhura në adresë të subjektit dhe verifikimet kanë treguar se çështjet janë të tilla që mund të zgjidhen në rrugë gjyqësore”, tha Çiftja. Vetë gjyqtarja Ukperaj, e cila ishte e pranishme në seancë pa avokat, tha se denoncimet lidhen me kompleksitetin e çështjeve që shqyrtohen në Gjykatën e Apelit Vlorë, ku ajo punon për më pak se dy vjet. Ajo tha se bën pjesë në atë pjesë të shëndoshë të sistemit të Drejtësisë dhe kërkoi rikonfirmim në detyrë. Unë besoj se bëj pjesë në atë pjesë të shëndoshë të sistemit të drejtësisë. Unë besoj te ky proces, besoj se gjyqtarët dhe prokurorët e ndershëm do të motivohen nga ky proces,” tha Ukperaj. Trupa gjykuese u tërhoq për vendim, i cili do të shpallet më 25 qershor.