Gjykata dënon me 14 vjet burg dy gjobëvënësit e “Zdrales”
Gjykata e Krimeve të Rënda ka dënuar me 14 vite burg dy të akuzuarit për gjobëvënie të tregtarëve dhe biznesmenëve në Shkodër. Gjykata vendosi të dënojë me 7 vite burg të pandehurin Fatmir Dibra. Po me 7 vite burg u dënua dhe i akuzuari tjetër Gëzim Vajushi. Sipas togave të zeza, vepra penale e “shtrëngimit me anë të kanosjes për dhënien e pasurisë” është kryer në formën e grupit të strukturuar kriminal. Para shpalljes së vendimit, të pandehurit kërkuan deklarimin e tyre të pafajshëm, duke mohuar akuzat. Kujtojmë që mesditën e 4 marsit të vitit 2017, Policia e Shkodrës, në bash- këpunim me forcat RENEA, shkatërroi një grup kriminal duke arrestuar 7 persona, që u vendoste gjoba bizneseve në qytetin verior. Ndërkohë që në 12 prill të këtij viti, Gjykata dënoi me 43 vite burg pjesëtarët e tjerë të këtij grupi të strukturuar kriminal. Në këtë mënyrë, Muhamet Lici do të vuajë dënimin me 8.8 vite heqje lirie, Abedin Bajraktari u dënua me 7.4 vite burg, Denis Skutina do të vuajë 6.8 vite heqje lirie dhe Besmir Domnari u dënua 6 vite burg. Gjykimi ndaj grupit të gjobëvënësve u nda në dy procese, pasi ndryshe nga dy të pandehurit që u dënuan ditën e djeshme, të cilët nuk pranonin akuzat, të pandehurit e tjerë pranuan gjykim të shkurtuar. Arrestimet kanë ardhur me kërkesë të Prokurorisë së Krimeve të Rënda, e cila pas hetimesh të gjata ka ngritur dyshime të arsyeshme se këta persona janë përgjegjës për veprat penale të “shtrëngimit me anë të kanosjes për dhënie pasurie” dhe “krijimit të grupit kriminal”. Anëtarët e grupit kishin për detyrë që të zbatonin urdhrat e drejtuesve të grupit, si edhe të raportonin mbi lëvizjet e punonjësve të Policisë në zonën e influencës së tyre apo dhe për persona të panjohur, automjete që janë pranë tyre apo depërtojnë në zonën ku ata banojnë dhe ushtrojnë “aktivitet”. Njëkohësisht, këta shtetas, në ditët e fundit të çdo muaji, kalojnë në lokalet apo dyqanet, në tregun Zdrale Shkodër, duke mbledhur lekët, duke raportuar dhe dorëzuar lekët e mbledhura te drejtuesit e grupit.