Krerët e shoqatave të pronarëve sulmojnë ish- zv. ministrin Idlir Peçi

Përfaqësuesit e Shoqatave të Pronarëve kanë kundërshtuar dje praninë e ish- zv. minsitrit të Drejtësisë, Idlir Peçi, si moderator i takimit të organizuar nga delegacioni i BE- së për çështjen e pronave. Idlir Peçi është zgjedhur ekspert i pronave në misionin Euralius IV , por prania e tij nuk është pranuar nga përfaqësuesit e Shoqatave të Pronarëve. Më i ashpër në deklarata ishte përfaqësuesi i shoqatave, Axhem Ymeraj, i cili tha dje se Idlir Peçi i kishte shkurtuar 5 vite nga jeta dhe se u kishte ngulur thikën pas shpinës. “Zoti Idlir Peçi është personi që na ka shkurtuar 5 vjet nga jeta, duke na tërhequr zvarrë ne pronarëve, duke na gënjyer dhe duke na mashtruar. Asnjëherë nuk na pranoi të futeshim te grupet e punës për të ndërtuar ligjin së bashku. Nuk mbahet shteti me gënjeshtra. Nuk mund të ketë drejtësi dhe të ndërtohet shteti i së drejtës, duke pasur njerëz që i shërbejnë me servilizëm qeverisë për interesat e karriges së tyre. Në qoftë se ju, përfaqësuesit e BE, keni nevojë të na bini këtu si moderatorë ata që na kanë krijuar neve dhimbje, ne na kanë futur thikën në palcë. Ne kemi një proverb: nuk ta shëron plagën e thikës ai që ta ka ngulur. Zoti Idlir Peçi na ka ngulur thikën. Nuk është në nderin e BE- së dhe tuajin që ai të jetë në atë vend. Nuk humbi Holanda për specialistë të pavarur, por duhet të bjerë nëpërmjet dorës së gjatë të Kryeministrit, Idlir Peçin. Nuk është në dertin e Europës që të na sjellë njerëz të tillë këtu”, tha Axhem Ymeraj. Edhe Ferdinand Sulaj, përfaqësuesi i shoqatës së pronarëve legjitimë, tha se tryezat e BE nuk duhet të modeloheshin nga ish- zv. ministri i Drejtësisë. “Kërkoj nga zonja Vlahutin që të përcaktojë modalitetet e tryezave të tjera dhe nuk ka nevojë që ato të modelohen nga zoti Ilir Peçi”, ka thënë Sulaj. Por vetë Idlir Peçi nuk u ka dhënë përgjigje akuzave të Shoqatës së Pronarëve.