“Shqiponjat” në Rusi, mbledhje urgjente te Zvicra
Sekretari: Asnjë njoftim, nuk besojmë te dënimi
Granit Xhaka dhe Xherdan Shaqiri ishin dy faktorët e suksesit të Zvicrës ndaj Serbisë, që i çoi në kuotën e katër pikëve, mirëpo dy futbollistët me origjinë shqiptare rrezikojnë jo pak.
Nisur nga presioni i federatës ruse apo ankesa që mund të bëjë ajo serbe, qoftë edhe për faktin se festimi me shqiponjë ka marrë vëmendjen e mediave botërore, mund të bëjë që FIFA të ndërmarrë masa penalizuese. Gjithçka vjen për shkak të përdorimit të simbolit të shqiponjës në festën e dy futbollistëve, për të cilën FIFA mund të meditojë edhe ndëshkime. Gjë, e cila do të ishte vërtet e rëndë për Zvicrën, pasi jo vetëm që do të penalizohej për një simbol që nuk ka lidhje me shtetin e tyre, por edhe do të humbiste shërbimet e dy yjeve të ekipit. MBLEDHJA URGJENTE
Fitorja me Serbinë e bën Zvicrën që të jetë vetëm një hap larg kualifikimit për në fazën pas grupeve. Nisja e Botërorit me barazim ndaj Brazilit dhe trepikëshi me përmbysje, e vendosin skuadrën helvete mes ekipeve favorite për të kaluar grupet, nisur edhe nga sfida e fundit me Kosta Rikën, e cila nuk llogaritet me koeficient maksimal vështirësie. Mirëpo, entuziazmi i dy lojtarëve me origjinë shqiptare, të cilët formuan shqiponjën me duar në tokën ruse, ka ngritur alarmin në kampin zviceran. Menjëherë pas festës, helvetët janë grumbulluar në mbledhje. Stafi dhe skuadra kombëtare janë bërë bashkë për të diskutuar për çfarë ka ndodhur. Në një konferencë për shtyp, Sekretari i Përgjithshëm i Federatës Zvicerane të Futbollit ka konfirmuar se po e ndjekin me jo pak shqetësim situatën. “Kemi folur për festën e tyre dhe mund të bëhet diçka, por emocionet nuk mund t’i ndalojmë. Sigurisht që ka vend për të diskutuar ende, por unë nuk mund të mendoj ndëshkimin e tyre nga FIFA. Nuk besoj se ka vend për masa, pasi nuk kemi asnjë sinjalizim të tillë”, ka deklaruar Aleks Misher.