Merkel kërkoi shtyrjen e votimit për negociatat
Paraditen e së martës, Kancelarja Merkel në punimet parlamentare në Bundestag ka kërkuar të mos ketë diskutim për Maqedoninë dhe Shqipërinë, duke qenë se kundërshtia e Francës dhe Holandës e bën të pamundur vendimmarrjen në datë 29. Teorikisht, dje ishte parashikuar votimi i Bundestagut për hapjen e negociatave mes Maqedonisë dhe Shqipërisë me BE- në. Burime nga Parlamenti gjerman bëjnë me dije se Merkel ka thënë se në këto kushte kur Franca dhe Holanda janë kundër hapave të mëtejshme të zgjerimit, mbledhja e datës 29 e ka të pamundur një vendimmarrje. Në konflikt të hapur me Macron mbi fatin e zgjerimit, Kancelarja gjermane ka menduar që diskutimi për Maqedoninë dhe Shqipërinë të shmanget tërësisht nga axhenda e mbledhjes së Këshillit, për aq kohë sa nuk ka konsensus të të gjitha vendeve anëtare nëse Bashkimi Europian duhet të vazhdojë zgjerimin, apo më parë të reformojë veten. Ky veprim taktik do të shpëtonte Shqipërinë dhe Maqedoninë nga një votë kundër në Këshillin Europian, që do të shtynte pa afat riformulimin e një rekomandimi të ri të Komisionit Europian për hapjen e negociatave të Shqipërisë dhe Maqedonisë me BE- në. Po dje, raportuesi për Shqipërinë Knut Fleckenstein, raportuesja për Kosovën Tanja Fajon, eurodeputeti Kukan, Monica Macovei dhe zyrtarë të tjerë të Brukselit kërkojnë nga Bashkimi Europian që të hapin negociatat për Tiranën e Shkupin dhe të liberalizojnë vizat për Kosovën. Përmes një letre që i është dërguar presidentit të Këshillit Europian, Donald Tusk, zyrtarët e BE kërkojnë që liderët të marrin një vendim pro zgjerimit të unionit në Ballkanin Perëndimor, që nis me hapjen e negociatave.