Vetëvritet me plumb në kokë shoferi i ministrit

Kush është 31- vjeçari Shkëlzen Qordja, shoferi i ministrit të Brendshëm, që u gjet me plumb në kokë. Policia: Ishte vetëvrasje. Reagon Xhafaj

Deklaratat politike në lidhje me ngjarjen e rëndë që ndodhi mëngjesin e djeshëm në Gardën e Republikës, e kanë detyruar të reagojë familjen e shoferit të ministrit të Brendshëm Fatmir Xhafaj. Në një kohë që, siç shprehen vetë ata, nuk ka fjalë as për t’i ngushëlluar, detyrohen nga këto deklarata, që ata i quajnë shqelma të politikës, të gjejnë fjalë për të bërë deklarata të tilla. “Është e pabesueshme për ne, që në kushtet e një tragjedie familjare që nuk i urohet as hasmit, të na duhet të përballojmë edhe shqelmat e politikës mbi trupin pa jetë të djalit dhe vëllait tonë, që e kemi në mes të shtëpisë!”, thuhet në reagimin e familjes së Shkëlzen Qordjas. Pas ngjarjes së rëndë ka pasur një sërë versionesh mbi ngjarjen, të cilat janë përcjellë nga media, por edhe nga ish- Kryeministri Sali Berisha. Kjo situatë solli reagimin e familjes Qordja, të cilët kërkojnë respekt për 31vjeçarin dhe që të mos e rëndojnë më shumë. Në një prononcim për “Temën”, kërkojnë që për qëllime politike të mos fabrikohen lajme mbi vdekjen e tij. “Kur s’ka fjalë dhe ngushëllim për ne sot, detyrohemi nga këto shqelma egërsirash të gjejmë fjalë për të bërë deklarata publike si familje! Por fatkeqësisht, nuk kemi asnjë rrugë tjetër përveçse t’u drejtohemi publikisht politikanëve që të na lënë të qajmë njeriun tonë. Të mos shkelin mbi çdo ligj e zakon, duke bërë atë që as gjaksi i kanunit nuk e ka bërë kurrë për viktimën e tij. Ju lutemi, mos e rëndoni djalin e vëllain tonë me fantazi dhe fabrikime për qëllimet tuaja. Për shpirtin e zi që ju shtyn në të tilla akte çnjerëzore nuk është fajtor i shtrenjti ynë dhe zija jonë del e tepron për supet e familjes sonë të thjeshtë. Prindërit dhe vëllezërit e të ndjerit Shkëlzen Qordja”, thuhet në prononcimin e familjes për gazetën “Tema”.