Pikturohen fasadat e pallateve, Veliaj: Tirana, qyteti i ngjyrave
Kryebashkiaku Erion Veliaj ecën me projektin që e nisi ish- kryebashkiaku, sot kreu i qeverisë, Edi Rama, për t’u dhënë jetë fasadave të pallateve. Në muajt e fundit, kushdo që ecën në rrugët e qytetit, ka vënë re punimet murale në hapësirat urbane, por pakkush e di që ato janë ideuar e dizajnuar nga artistë nga e gjithë bota, që janë stacionuar për disa kohë në Tiranë për të kthyer fasadat e pajeta në vepra arti. Duke falënderuar artistët e ardhur nga 15 vende të ndryshme, Veliaj tha se “Mural fest” do të kthehet në një traditë të përvitshme. “Shumë prej fasadave me artistë shqiptarë e të huaj i kanë dhënë qytetit më shumë shije. Minimalisht do të kemi më pak ndotje estetike, por do kemi edhe një bisedë të re, që do të nisë me provokimet artistike. Jam këtu që t’i falënderoj me gjithë zemër, që na kanë nderuar dhe besoj se kemi filluar një traditë, të cilën do ta përsëritim çdo vit, me artistët tanë, për t’u siguruar që Tirana e ruan reputacionin si qyteti i ngjyrave”. Veliaj përmendi edhe periudhën e drejtimit të bashkisë nga Kryeministri aktual, i lumtur që kryeqytetit do t’i rikthehen sërish ngjyrat. “Tirana ka pasur një traditë shumë të mirë nga vitet 2000- 2011, në kohën e Edi Ramës, ku ngjyrosja e pallateve, lyerja e tyre me ngjyra, përcjell diçka ndryshe nga grija që kemi trashëguar, nga koha e Luftës së Ftohtë dhe gjithë trashëgimia sovjetike e komuniste, për t’i dhënë ngjyrë qytetit. Ka qenë një eksperiencë fantastike, po e ringjallim atë përvojë”, nënvizoi kryebashkiaku.
Veprat murale nëpër qytetet kryesore të botës si Berlin, Londër, Vankuver etj. janë kthyer në një instrument tërheqës për rritjen e turizmit dhe njëkohësisht kanë ndikuar në përmirësimin e mjaft problematikave ekonomike, mjedisore dhe sociale, me të cilat ballafaqohen sot qendrat urbane.