Protesta: Jemi në diktaturë, beteja vazhdon
Gjata: Gjëma ndodhi në letër, mos e lëmë të ekzekutohet
Miratimi me 75 vota i projektligjit, që u hap rrugën negociatave me privatin për ndërtimin e godinës së re të Teatrit Kombëtar, duke shembur atë ekzistues, nuk i ka ndalur protestat e artistëve në oborrin e TK- së. Ata u shprehën edhe njëherë për vendosmërinë e tyre për të mos lejuar shembjen e godinës së TK- së dhe ftuan qytetarët t’i mbështesin në këtë betejë. Juristi Çlirim Gjata vuri në dukje edhe një herë antikushtetueshmërinë e ligjit të miratuar mbrëmjen e së enjtes. “Kur maxhoranca mblidhet për të votuar një ligj të tillë, tregon për abuzimin në shkallën më të lartë të mundshme, shkeljen kushtetuese. Është pak të thuash gabim. Është qëllimi i keq në shkallën sipërore. Një ligj nuk del për një emër të caktuar, ligji ka karakter normativ të përgjithshëm, jo në mënyrë konkrete. Pse u bë me ligj, kur mund të bëhej me Këshill Bashkiak? Por bashkia nuk e kishte shumicën. Mund ta bënte Ministria e Kulturës, të hapte një tender kombëtar apo ndërkombëtar; mund ta bënte dhe qeveria me VKM, por jo Parlamenti, është antikushtetuese, sepse me këtë krijon precedentin më të keq, sepse nesër miratojmë ç’na teket, shkatërrojmë, marrim bregdet, ç’të duan për qëllime përfitimi. Pse kësaj maxhorance i duhej ky ligj? Sepse ndryshe do mbanin përgjegjësi penale, që nesër të mos përballen me gjykatën. Me një nen deputetët nuk mbajnë përgjegjësi për votën, por kjo s’do të thotë që ata duhet të shkatërrojnë Shqipërinë. E bënë se janë frikacakë”, tha Gjata, duke përmendur edhe indiferencën e përfaqësuesve të diplomacisë së huaj në Tiranë, por edhe veprimin
e deputetit Pandeli Majko, që nuk pranoi të votonte shembjen e Teatrit, që e ka zmbrapsur dy herë. “Gjëma ndodhi në letër, të mos e lëmë të ekzekutohet”, tha ai. Deputetin e vetëm socialist që nuk votoi shembjen e TK- së, e falënderuan edhe të tjerë protestues. “Duhet ta falënderojmë të gjithë zotin Majko. Rreth kësaj kauze u mblodhën qytetarë, arkitektë, intelektualë, deputetë, erdhën shoqëri me ngjyrime të ndryshme dhe të gjithë bënë detyrën e tyre. Dhe kjo bën të veçantën e kësaj kauze. Kjo kauzë shërben kur ky teatër të qëndrojë në këmbë. Është natyra e punës sonë që i bashkon njerëzit. Nëse përqendrohemi në këtë pikë: të ruajmë këtë godinë, më vonë do vijojmë luftëra të tjera që na shqetësojnë. Jam më i qetë, se tani e dimë që jemi në diktaturë. Pas kësaj pritet reagim”, tha regjisori dhe një nga rezistuesit më afatgjatë të protestës, Robert Budina. “Kjo betejë nuk do dekurajim, i duhet çdo minutë”, duke e krahasuar me betejën e Stalingradit, avokati Adriatik Lapaj tha që kjo tanimë është një “betejë kundër pushtuesit të tokës publike, të historisë, ndaj duhet vazhduar deri në fund”. Ndërsa avokatja Mirela Jorgo kërkoi të bëhet kallëzim penal për falsifikimin e votës së deputetit Vangjel Tavo, i cili nuk ishte i pranishëm gjatë votimit.