Drogë në lokalet e natës, “Forca e Ligjit” godet shpërndarësit
TIRANE – “Forca e Ligjit” godet sërish, këtë herë një grup që shpërndante lëndë narkotike në lokalet e natës në Tiranë. Policia e kryeqytetit, gjatë një operacioni, ka arrestuar 5 anëtarët e grupit që shpërndante lëndë narkotike, të llojit heroinë dhe kokainë. Organizatori, sipas Policisë, është Shaqir Shtishi i dënuar më parë, ndërsa bashkë me të në pranga ranë edhe Edmond Vlashi, Etmir Feta, i dënuar më parë, dhe Ylber Gaxherri. Sipas Policisë, grupi shpërndante dozat me lëndën narkotike në lokalet e natës në zonat e “Brrylit”, “Komunës së Parisit”, “Shkozës”, “Xhamllikut”, “IshBllokut”, “Oxhakut” dhe “Unazës së Re”. Në kuadër të këtij procedimi penal, është identifikuar dhe arrestuar dhe shtetasi Kristo Papa, 62 vjeç, banues në Tiranë, i cili bashkëpunonte me këtë grup kriminal. Pjesë e grupit, por të arrestuar rreth 8 muaj më parë, janë edhe Klejvi Kalivaçi, Alti Zhurzhi, Tedi Neziri, Jani Beja dhe Flamur Algjoni. Drejtori i Policisë së Tiranës, Kastriot Skënderaj, i shoqëruar nga zv. drejtori Arsen Sinomati, gjatë një konference për shtyp pasditen e djeshme deklaroi se janë sekuestruar; përzierës, kokainë dhe heroinë. Gjithashtu, janë sekuestruar edhe 3 automjete dhe një sasi lekësh e eurosh. Drejtori Skënderaj u shpreh se në kuadër të operacionit “Forca e Ligjit” janë kryer në këto 8 muaj, 13 goditje dhe rreth 120 persona të arrestuar dhe mbi 10 milionë euro të sekuestruara. “Operacioni ‘ Forca e Ligjit’ godet një tjetër grup kriminal me aktivitet në fushën e tregtimit dhe trafikimit të narkotikëve, me 10 persona të arrestuar. Seksioni për Hetimin e Narkotikëve në Drejtorinë Vendore të Policisë Tiranë, pas një hetimi 7- mujor me metoda speciale të hetimit në bashkëpunim me Prokurorinë e Rrethit Gjyqësor Tiranë, finalizuan operacionin e koduar ‘ Porosia e natës’, duke ekzekutuar masat ‘ arrest me burg’ për 5 të dyshuarit kryesorë. Në kuadër të këtij procedimi penal, është identifikuar dhe arrestuar dhe shtetasi Kristo Papa, 62 vjeç, banues në Tiranë, i cili bashkëpunonte me këtë grup kriminal”, tha dje gjatë konferencës drejtori i Policisë së Tiranës.