Furgoni përfundon 20 metra në humnerë, katër të plagosur
Dy prej të plagosurve rëndë, transportohen në Tiranë
Dje pasdite, në vendin e quajtur “Përroi i Lopëve”, afër Krastës së Martaneshit, ka ndodhur një aksident i rëndë automobilistik, ku mbetën të plagosur katër persona, dy prej të cilëve në gjendje të rëndë.
Fillimisht, Policia bëri me dije se aksidenti kishte ndodhur në aksin TërnovëBulqizë, madje u tha se janë aksidentuar katër minatorë. Por rreth orës 18: 00 është saktësuar se ngjarja ka ndodhur në territorin e njësisë administrative Martanesh, Bashkia Bulqizë. Një automjet doli nga rruga dhe ka rënë në një humnerë rreth 20 metra, duke vënë në rrezik jetën e pesë personave, drejtuesit të automjeti tip “Mercedez Benz”, Y. H, dhe katër pasagjerëve. Burime zyrtare pranë Komisariatit të Bulqizës saktësuan se janë dëmtuar pasagjerët, A. S, 45 vjeç, i cili është transportuar me helikopter drejt Tiranës, D. M, 42 vjeçe, është transportuar me ambulancë drejt Tiranës, Xh. K, 44 vjeçe dhe V. K, 32 vjeçe, të cilat po marrin ndihmë në Spitalin e Bulqizës. Ato ndodhen jashtë rrezikut për jetën. Pas ngjarjes, drejtuesi i automjetit është lar- guar nga vendi i ngjarjes në rrethana të paqarta dhe po punohet për kapjen e tij. Kanë qenë përdoruesit e rrugës Qafa e Buallit- Krastë ata që u kanë dhënë ndihmën e parë dhe i kanë transportuar katër të plagosurit drejt spitalit të Bulqizës. Mjekët pasi kanë kryer vizitat e të plagosurve kanë kërkuar ndihmën e Ministrisë së Shëndetësisë dhe është mundësuar transportimi i A. S, me helikopter drejt kryeqytetit. Grupi hetimor vijon hetimet në vendin e ngjarjes, po punohet për zbardhjen e shkaqeve të ak- sidentit të rëndë. “Rreth orës 17.50, Policia e Bulqizës ka marrë njoftim se në aksin e rrugës dytësore Tërnovë- Bulqizë, një automjet ka dalë nga rruga. Menjëherë është ngritur grupi hetimor ku nga verifikimet paraprake kanë konstatuar se ka dalë rreth 20 metra poshtë rrugës, automjeti tip ‘ Mercedez Benz’, me drejtues Y. H, dhe për pasojë janë dëmtuar pasagjerët , A. S, 45 vjeç, i cili është transportuar me helikopter drejt Tiranës, D. M, 42 vjeçe, është transportuar me ambulancë drejt Tiranës, Xh. K, 44 vjeçe dhe V. K, 32 vjeçe, të cilat po marrin ndihmë në Spitalin e Bulqizës, jashtë rrezikut për jetën. Po punohet për kapjen e drejtuesit të automjetit pasi është larguar nga vendi i ngjarjes”, bën të ditur Policia.