Kryemadhi: Rama, Policia dhe askush s’do mundet të prishë Teatrin Kombëtar
Kryetarja e Lëvizjes Socialiste për Integrim, Monika Kryemadhi, ka akuzuar dje Kryeministrin Rama se ai është përgjegjësi i vetëm për shkatërrimin e Teatrit Kombëtar. Në një reagim në “Facebook”, Kryemadhi ka thënë dje se Edi Rama heshti në Kuvend, edhe pse mori një vendim antikombëtar. Për kryetaren e LSI- së, Ramën dhe bashkëpunëtorët e tij i tremben forcës së ligjit, që një ditë do të veprojë mbi ta për vendimin e shkatërrimit të një prej godinave historike të Tiranës. “Edi Rama heshti dje përgjatë 12 orëve të seancës në Parlament. Heshti sepse frika për vendimin e prishjes së teatrit është më e fortë se dëshira për t’iu kundërvënë opozitës. Heshti sepse më mirë se të gjithë kukullat e tij, ai e di se ky vendim antikombëtar do të ketë kurbanin e tij një ditë. Dhe ai që ka bërë kurban shokë e bashkëpunëtorë, i trembet më shumë se të gjithë forcës së ligjit, që dje e sot mungoi, por një ditë do të rëndojë mbi të gjithë ata, që me votën e tyre shkatërruan njërën nga pak vlerat e kulturës dhe qytetarisë që kanë mbetur në Tiranë”, është shprehur Kryemadhi. Në reagimin e saj, kryetarja e LSI- së ka thënë se Rama nuk foli asnjë fjalë në Kuvend për vendimin e prishjes së Teatrit, pasi nuk do të lërë gjurmë në procesverbalet e Parlamentit se është ai ideatori i shembjes së Teatrit. Por sipas saj, qytetarët do ta mbrojnë godinën e Teatrit Kombëtar me çdo formë dhe me çdo kusht. “Edi Rama heshti dje në Parlament me shpresën se nuk do të regjistrohet në procesverbalet e Parlamentit si njeriu që ideoi dhe zbatoi shkatërrimin e Teatrit Kombëtar, duke harruar se sado të fshihet pas gishtit, sot të gjithë shqiptarët e kanë të qartë se përgjegjësia është vetëm e tij. Sikundër është e qartë se qytetarët do ta mbrojnë teatrin me çdo kusht, me çdo formë e me çdo mënyrë”, ka thënë ajo. Në mesazhin e saj, Kryemadhi ka dhënë një mesazh edhe për drejtuesit e institucioneve, si Policia apo ata që do të realizojnë prishjen e Teatrit, se nuk do t’i shpëtojnë përgjegjësisë. “Asgjë nuk e shpëton Edi Ramën nga përgjegjësia për shkatërrimin e teatrit, sikundër asnjë forcë shtetërore, policore apo fadrome nuk do mund të prishë Teatrin Kombëtar!”, ka thënë ajo.