Staf shtesë e rritje rrogash, zbardhen kërkesat e Vetingut për kreun e Kuvendit
KPK: Kemi vetëm katër këshilltarë ekonomistë për dosjet që hetohen, na duhen edhe tetë të tjerë
Komisioni i Pavarur i Kualifikimit i është drejtuar Kuvendit të Shqipërisë me një shkresë zyrtare, duke kërkuar shtim në personel. Kjo kërkesë vjen në një kohë kur Komisioni i Pavarur i Kualifikimit po përballet me një volum pune të madh dhe me presionin për të përfunduar procesin e rivlerësimit të prokurorëve dhe gjyqtarëve brenda afatit prej pesë vjetësh, aq sa ka edhe mandatin institucioni.
Mirëpo, kur në sitën e vetingut duhet të kalojnë të paktën 800 subjekte, deri më tani kanë kaluar 23, ndërsa mbi 10 janë dorëhequr. Kjo e vendos Komisionin e Pavarur të Kualifikimit përballë një situate të vështirë dhe kërkon shtim të personelit me të paktën 16 punonjës të tjerë. Së pari, Komisioni kërkon 8 këshilltarë ekonomistë për dosjet hetimore administrative të pasurive të subjekteve. Aktualisht, KPK ka vetëm katër këshilltarë ekonomistë dhe kërkon që ky numër të shkojë në 12. Gjithashtu, Komisioni kërkon edhe dy përkthyes shtesë, pasi sipas letrës që i ka dërguar Kuvendit, ka shumë volum pune për tre përkthyesit që ka, që duhet të përkthejnë çdo dosje për partnerët e ONM- së. Komisioni kërkon edhe dy specialistë prokotokolli, pasi ka vetëm një në strukturë, si edhe dy specialistë të sekretarisë gjyqësore. KPK nënvizon në letër rëndësinë e pasjes së një specialisti prokurimesh dhe shtimin e personelit të sanitarëve edhe me një punonjës. KËRKESAT E KPK
Organika ka në përbërje 12 këshilltarë juristë dhe 4 këshilltarë ekonomistë. Pas shpërndarjes së çështjeve në trupat gjykuese, një këshilltar ekonomik duhet të punojë njëkohësisht me 3 këshilltarë juristë për tri çështje të ndryshme, pra, të mbulojë trefishin e punës së këtyre të fundit. Duke parë ngarkesën e madhe dhe voluminoze në mbulimin e dosjeve të subjekteve të rivlerësimit, kohën e limituar që ka institucioni ynë për realizimin e misionit, objektivave dhe detyrave të caktuara nga Kushtetuta, e vlerësojmë si tepër të rëndësishme rritjen e numrit të personelit me: 8 këshilltarë ekonomistë, duke e çuar numrin e tyre në 12 këshilltarë ekonomistë.
Gjithashtu, në përbërjen e institucionit sot punojnë vetëm 3 përkthyes, të cilët duhet të sigurojnë realizimin e një numri të madh faqesh përkthimi brenda një kohe të shkurtër dhe me cilësi të lartë. Duke marrë parasysh rëndësinë e veçantë që ka përkthimi për komunikimin e akteve dhe gjithë dokumentacionin te partnerët e huaj, kërkojmë shtesë personeli me 2 përkthyer për të arritur në total 5 përkthyes.
Në strukturën e Komisionit është parashikuar vetëm 1 specialist protokoll/ arkive. Gjatë kësaj periudhe të parë të punës është vënë re se specialisti është përballur me një volum të lartë pune që rrjedh nga sasia e madhe e dokumentacionit hyrës dhe dalës, që duhet të pranohet dhe të shpërndahet në trupat gjykuese. Më konkretisht, vetëm gjatë 6- mujorit të parë të vitit 2018, numri rendor i protokollimeve ka arritur mbi 5000. Duhet theksuar se një shkresë dalëse më anë të së cilës kërkohet informacion, dërgohet në 36 drejtime të ndryshme ( ku përfshihen bankat, degët e tatimeve, zyrat vendore të regjistrimeve të paluajtshme, ILDKPKI, Prokuroritë, degët e ALUIZNI- t etj). Duke pasur parasysh sa më sipër, kërkojmë shtesë në personel me 2 specialistë shtesë protokoll/ arkivë.
Në strukturën e Komisionit janë parashikuar vetëm 4 specialistë të sekretarisë gjyqësore, një për secilën nga katër trupat. Nga përvoja e deritanishme kemi konstatuar nevojën e më shumë specialistëve të sekretarisë, veçanërisht për mbarëvajtjen e procesit të apelimit të vendimeve të Komisionit në Kolegjin e Posaçëm të Apelimit. Kjo, për arsye sepse procedura e dërgimit të vendimeve të ankimuara në Kolegjin e Posaçëm të Apelimit është e ngjeshur dhe duke marrë parasy- sh volumin e faqeve të dokumenteve ( më shumë se një mijë faqe për një çështje), të cilat inventarizohen, numërohen dhe siglohen, kërkon një kohë të gjatë dhe më shumë burime njerëzore për të respektuar të gjitha kërkesat dhe afatet ligjore që lidhen me ankimin. Për këtë arsye, kërkojmë një shtesë prej 2 specialistësh të sekretarisë gjyqësore.
Komisioni konstaton nevojën e një specialisti prokurimesh, detyrë të cilën aktualisht e mbulon një nga specialistet e sekretarisë gjyqësore. Për këtë arsye, kërkojmë shtesë në organikë me 1 specialist prokurimesh.
Godina ku ushtrohet veprimtaria jonë përbëhet nga katër kate, tre prej të cilave janë mjedise pune për stafin e Komisionit. Organika ka parashikuar vetëm një punonjës pastrimi. Duke marrë në konsideratë respektimin e kushteve higjieno- sanitare, kërkojmë shtesë me 1 punonjës pastrimi.