Grekët flasin për shtyrje të paktit detar deri në 2019
Gazeta greke “Kathimerini”: Marrëveshja me Shqipërinë, pasi të finalizohet ratifikimi i marrëveshjes për emrin e Maqedonisë
Qeveria greke ka vendosur ta shtyjë për më vonë finalizimin e marrëveshjes paketë me Shqipërinë.
“Në sirtar, negociatat me Shqipërinë”, me këtë titull e përditshmja greke “Kathimerini” shkruan se për shkak të debatit të brendshëm politik, pas marrëveshjes me Shkupin për emrin e ri të Maqedonisë, pritet që Rama dhe Tsipras të shtyjnë nënshkrimin e marrëveshjeve. Shkaku i këtij vendimi gjendet në “reagimet e furishme” për marrëveshjen Athinë- Shkup mbi çështjen e emrit të Maqedonisë, shkruan e përditshmja greke“Kat hime rini ”. “Stuhia e reagimeve për marrëveshjen e Prespës ka krijuar shqetësim në selinë kryeministrore. Prandaj dhe mendohet shtyrja e zgjidhjes së disa problemeve ( me Shqipërinë), pasi të finalizohet rruga e mundimshme e ratifikimit të marrëveshjes për emrin”, shkruan “Kathimerini”. Por gazeta vë në dukje se “negociatat me Tiranën nuk kanë për t’u ndërprerë, posaçërisht ndërmjet komisioneve që po merren me anën teknike të marrëveshjes për zonat ekskluzive ekonomike”. Sipas “Kathimerini”, “përtej dimensionit politik të çështjes, negociatat me Shqipërinë për ZEE shpeshherë komplikohen për shkak të ekuilibrave të brishtë politikë në vendin fqinj. Aty, Presidenti i Shqipërisë, Ilir Meta, paraqitet skeptik për miratimin e një marrëveshjeje që siç duket, Kryeministri Edi Rama është shumë më i gatshëm të promovojë”. “Në axhendën e brendshme të Shqipërisë - ku tematika shtrohet gjithmonë me tone ekstremegjendet shumë lart çështja e të quajturës ‘ Çamëri’, që siç ka deklaruar në mënyrë të përsëritur pala greke, nuk ndodhet në tavolinën e bisedimeve”, vazhdon “Kathimerini”. Sipas gazetës greke, ajo, që po diskutohet, lidhet me pasuritë e shtetasve shqiptarë që janë vënë në sekuestro që nga shpallja e ligjit të gjendjes së luftës, në vitin e largët 1940. “Kathimerini” vë në dukje se deri në këto momente janë bërë hapa të pjesshëm në çështje të një rëndësisë jo të prekshme, siç është vula apostile apo njohja e patentave shqiptare, ndërsa ndodhet në zhvillim e sipër procesi i zhvarrimit dhe identifikimit të ushtarëve grekë që ranë në luftën italo- greke. Gazeta u referohet citimeve të herëpashershme nga burimet diplomatike greke, sipas të cilave “është shënuar progres në çështjet që kanë të bëjnë me të drejtat e minoritetit etnik grek në Epirin e Veriut”. Nga ana tjetër, ende mbetet pezull çështja e ligjit të gjendjes së luftës, sa nga pala greke dhe ajo shqiptare, për shkak të disa vështirësive juridike, përfundon “Kathimerini”. Pak ditë më parë, ministri i Jashtëm Bushati tha se çështja çame vijon të jetë pjesë e paketës së bisedimeve me palën greke. “I gjithë procesi i bisedimeve me Greqinë në vështrimin tonë është i ndarë në tri shporta apo kategori. Çështjet që e kanë origjinën te Lufta e Dytë Botërore, duke filluar nga ligji famëkeq i luftës që është ende në fuqi në Greqi. Brenda kësaj shporte ne kemi disa çështje. Kemi ligjin e luftës, kemi çështjen çame, kemi çështjen që ka të bëjë me të rënët e ushtarëve grekë gjatë luftës italo- greke në Shqipëri e kështu me radhë. E para, ka lidhje me kufizimin e zonave detare, e dyta, ka të bëjë me mirëmbajtjen e kufijve ekzistues tokësor me mirëmbajtjen e piramidave dhe menaxhimin e incidenteve kufitare, sepse në të shkuarën ne kemi vënë re që ka pasur shumë incidente në këtë drejtim”, tha Bushati.