Universitetet, gabimet që duhen shmangur në formularin A2
Vrapi: Bëni zgjedhjen inteligjente, të përputhet dëshira e aftësia. Konsultohuni me pikët e fituesit të fundit nga viti i kaluar
Pak ditë pasi kanë përmbyllur provimet e Maturës Shtetërore, e gjithë vëmendja e maturantëve, tashmë kandidatë për në universitete, është kthyer nga degët e preferuara.
Ndërkohë që disa e kanë ndarë mendjen se ku duan të shkojnë, të tjerë janë në dilemë në zgjedhjen e profileve që i bëjnë ata fitues. Në një intervistë për gazetën, drejtoresha e Qendrës së Shërbimeve Arsimore, Rezana Vrapi, tregon disa nga gabimet më të shpeshta që bëjnë të rinjtë që nga aplikimi e deri te regjistrimi në universitete. Përpara plotësimit të formularit A2, ajo këshillon kandidatët të konsultohen me programet e studimit për të përzgjedhur ato degë që jo vetëm i dëshirojnë, por edhe besojnë se kanë pikët e duhura për t’i fituar. Nuk këshillohet të lihen jashtë formularit edhe universitetet private, për të cilat në rast se nuk aplikohet që në krye të herës, nuk mund të regjistrohesh, pavarësisht se sa kuota mund të ngelen bosh.
Pas disa ditësh nis plotësimi i Formularit A2. Si bëhet ai?
Janë rreth gjashtë ditë, nga 30 korrik- 4 gusht, gjatë të cilave çdo maturant që ka dëshirë të aplikojë në një nga programet e studimit që ofrojnë universitetet në Shqipëri, është i lirë ta bëjë këtë gjë. Aplikimi bëhet online. Ministria e Arsimit ka publikuar një video me udhëzimet teknike sesi do të zhvillohet procedura, megjithëse nuk ka ndonjë ndryshim nga viti i kaluar. Ata sërish do të aplikojnë me dhjetë preferenca, nuk ka rëndësi renditja e tyre.
Çfarë do t’iu këshillonit kandidatëve përpara se të bëjnë përzgjedhjen e tyre?
Përpara plotësimit të formularit A2, kohë më përpara, ata duhet të kenë bërë kërkimet e tyre se sa i përmbushin kriteret dhe kjo është shumë e rëndësishme. Pra, më tepër se sa procedura në vetvete, e cila është shumë teknike, maturantët duhet t’iu kushtojnë një kujdes shumë të madh kritereve të pranimit për ato programe, te të cilat ata duan të aplikojnë. Kjo do të thotë se ata duhet patjetër të klikojnë dhe të marrin informacion në faqen e çdo universiteti që ka këto programe dhe të shikojnë kriteret e pranimit. Tashmë ato janë publike, janë në faqen e ministrisë, në faqen e vetë universitetit apo portalit u- albania, përmes së cilës ata do të bëjnë aplikimet për në universitet. Kur them që duhet të shikojnë kriteret, do të thotë që duhet të bëjnë një përllogaritje të notave që kanë të bëjnë me mesataren e të tre viteve. Ajo që unë apeloj është kujdesi që duhet të tregojnë me kriteret. Nuk mjafton të kesh një mesatare mbi 6, por duhet të fillosh të kontrollosh nëse notat që ke të mundësojnë të shkosh në x degë. Çfarë i skualifikon maturantët? Në radhë të parë ajo që i skualifikon, është mesatarja e pikëve që ata kanë. Dhe ndonjëherë nuk tregojnë inteligjencën e duhur për të zgjedhur degën që ata mund të përmbushin me këto kritere. Gjithsesi, unë sërish iu them maturantëve që nuk mund të shkojnë në një degë vetëm sepse përmbushin kriterin e pikëve, kur ndërkohë nuk e duan. Realisht, ata duhet të kuptojnë çfarë iu pëlqen, çfarë duan të bëjnë në jetë dhe ta kërkojnë atë degë. Por, nëse pikët e tyre janë të pamjaftueshme, ata kanë për të humbur. Duhet të jenë shumë të kujdesshëm për të parë të gjitha programet e studimit dhe t’i shohin me kujdes e më pas të bëjnë zgjedhjen e tyre inteligjente. Për këtë, duhet të jenë dy elemente që përputhen: e para, dëshira e tyre për të studiuar në këtë program dhe e dyta, sa i çon merita dhe aftësia e tyre në atë program. Nëse këto nuk përputhen, ata rezultojnë me degë që edhe mund t’i fitojnë, por nuk i duan. Një tjetër gabim është padurimi. Në momentin që fillojnë fazat e regjistrimit, ata shpallen fitues në një degë dhe nga frika se mos nuk dalin fitues te dega që realisht e duan, shkojnë menjëherë dhe regjistrohen dhe më vonë shikojnë se kishin shanse për ta fituar atë që donin. E gjitha është një lloj kujdesi që ata duhet të tregojnë gjatë regjistrimit për të parë se si ulet viza. Padurimi ka treguar që shpeshherë ata janë ndëshkuar në lidhje me preferencën e tyre, sepse kanë shkuar diku që s’e kanë dashur, vetëm sepse s’kanë pritur.
A kanë vlerë pikët e fituesit të fundit nga viti i kaluar?
Po, çdo maturant që dëshiron një degë të caktuar, mund të shikojë fituesin e fundit nga viti i kaluar. Informacioni është i hapur tek u- albania dhe të bëjnë një lloj përllogaritje. E gjitha është sa të qartë janë ata në lidhje me atë çfarë kanë arritur gjatë viteve të shkollës dhe Maturës Shtetërore dhe përputhur sigurisht edhe me kërkesën dhe dëshirën që ata kanë.
Ka ende maturantë që nuk janë në dijeni se pa i përzgjedhur edhe degë të universiteteve private në formularin A2, nuk mund të regjistrohen kur ata të dëshirojnë. Do t’i këshillonit të këmbëngulnin që degën që duan, në çfarëdo universiteti qoftë?
E vetmja gjë që mund t’iu them është që nëse nuk kanë aplikuar në një degë, e kanë të pamundur që të shkojnë, pavarësisht se sa kuota bosh mund të ketë. Ata duhet të aplikojnë, nuk ka rëndësi nëse është privat apo publik. Programet janë të gjitha në dispozicion. Ata duhet thjesht të aplikojnë në programin përkatës, qoftë në shkollë publike apo private. Nëse nuk e kanë klikuar në listën me dhjetë preferenca, e kanë të pamundur ta ndjekin atë. Mësuesia këtë vit vjen me risi... Po. Të gjithë ata maturantë që duan të aplikojnë në një profil që ka lidhje me mësuesinë, duhet të jenë në dijeni të vendimit të marrë tashmë nga qeveria, që nuk mundet të aplikojnë nëse mesatarja e tyre është nën 7. Kjo është një nga masat që ka marrë Ministria e Arsimit për të rritur cilësinë e prurjeve në universitete të atij kontingjenti që nesër mendon se do të bëhet mësues. Prandaj, nëse mesatarja e tyre është qoftë dhe një pikë nën 7, ata e kanë të pamundur të aplikojnë.
Sa është numri i përafërt i kandidatëve që pritet të plotësojnë formularin?
Është diçka që ka të bëjë me vullnetin e çdo maturanti, dëshirën për të vazhduar ose jo. Duke parë shifrat e viteve të kaluara, ne kemi pasur rreth 26 mijë maturantë në të dy raundet e aplikimet. Në këtë raund janë të gjithë ata që rezultojnë kalues dhe përmbushin të gjitha kriteret për të aplikuar në universitet. Në raundin e dytë që do të jetë në shtator, pasi të mbyllen provimet e vjeshtës, do të aplikojnë të gjithë ata, të cilët nuk kanë fituar në raundin e parë apo nuk aplikuan dot sepse kanë qenë mbetës. Pra, ka një shans të dytë, sigurisht me kuotat bosh që mbesin. Këtë vit, numri i maturantëve në total është pak më i ulët se vjet, 36 mijë nga 37 mijë maturantë që kanë qenë vjet. Duhet të kemi parasysh që do të marrin pjesë edhe ata që nuk kanë fituar vjet, apo dhe ata që duan të ndryshojnë degën, pasi bëjnë një çregjistrim.