Ritmet e vetingut, KLGJ e KLP nuk ngrihen në shtator
KPK ka rikonfirmuar 9 kandidatë, 4 janë shkarkuar dhe një është dorëhequr
Që nga muaji mars, kur Komisioni i Pavarur i Kualifikimit nisi seancat dëgjimore për subjektet e drejtësisë që janë në listën e përparësisë, në filtrat e drejtësisë kanë kaluar vetëm 21 subjekte, ndërsa ne pritje, javën që vjen, janë edhe tre.
Nga ana tjetër, lista e përparësisë përbëhet nga 57 subjekte, ku mes tyre janë 14 kandidatë për Këshillin e Lartë të Gjyqësorit, 19 kandidatë për Këshillin e Lartë të Prokurorisë dhe 9 për Këshillin e Emërimeve në Drejtësi. Pjesa tjetër përbëhet nga gjyqtarë të Gjykatës së Lartë dhe asaj Kushtetuese që nuk janë kandidatë në asnjë prej tri institucioneve që priten të ngrihen kur Parlamenti të rifillojë punimet pas ndërprerjes verore. Megjithatë, duket se ngritja e këshillave prej të cilave varen institucione, si SPAK, duket se nuk do të ndodhë në shtator. Burime brenda Ministrisë së Drejtësisë, thonë për “Panorama” se ky institucion priste që lista prioritare e subjekteve që i nënshtrohet vetingut të përfundonte brenda gushtit. Mirëpo, kur i afrohemi mesit të korrikut, përfundimi brenda asaj kohe i të gjithë listës duket i pamundur. Kështu, ndër 14 kandidatët për Këshillin e Lartë Gjyqësor, vetëm gjysma i është nënshtruar vetingut që nga muaji mars. Pra, kemi 7 kandidatë që kanë kaluar në filtrat e drejtësisë dhe nga këta, për pesë është marrë vendim, një është në pritje të vendimit dhe një është dorëhequr. Ndërsa Këshilli i Lartë i Prokurorisë ka 19 kandidatë, nga të cilët vetëm 6 kanë kaluar në filtrat e drejtësisë. Vetëm për anëtarët e KED vetingu ka ecur më shpejt, duke kaluar katër në filtrat e drejtësisë, ndërsa i pesti është dorëhequr. Sipas ligjit dhe ndryshimeve kushtetuese, duhet që fillimisht të përfundojë lista prioritare e vetingut, në mënyrë që anëtarët e KED të mblidhen së bashku me komisionet AD- HOC për të përzgjedhur përfundimisht kandidatët që do të emërohen pas kalimit të vetingut në KLGJ dhe KLP. Ngritja e këtyre dy institucioneve do t’i hapte rrugë edhe ngritjes së SPAK- ut. Por përveç vonesës dhe pamundësisë për ta përmbyllur brenda gushtit listën prioritare, reforma duket se ka edhe një problem potencial. Fjala është për shkarkimet dhe sa prej kandidatëve për këto këshilla kalojnë vetingun. Deri më tani, në Këshillin e Lartë të Gjyqësorit kemi katër kandidatë të rikonfirmuar, ndërsa vetëm një është shkarkuar dhe një tjetër është dorëhequr. Gjithashtu, pritet që në ditët në vazhdim të shkarkohet edhe një gjyqtar tjetër, që ka probleme me pasurinë, por ende s’ka marrë vendim. KLGJ, sipas ligjit, do të ketë 11 anëtarë, ku gjashtë do të zgjidhen nga radhët e Gjyqësorit. Për KLP- në, nga 19 kandidatët që janë në listë pri- oritare, në veting kanë kaluar vetëm gjashtë, ku tre janë rikonfirmuar, dy janë shkarkuar, ndërsa një ka kaluar, por është dorëhequr. Situata paraqitet disi më e rëndë për Këshillin e Emërimeve të Drejtësi që ka 9 anëtarë, nga të cilët dy janë shkarkuar, një është pezulluar, një është dorëhequr dhe vetëm dy kanë kaluar. Në rast se do të ketë më shumë se gjysmën e kandidatëve të shkarkuar nga KPK dhe KPA, qoftë për KLGJ, qoftë për KLP, atëherë do të duhet që të përzgjidhen të tjerë dhe t’u nënshtrohen filtrave të vetingut. Kjo do të thotë se është e pamundur që KLGJ dhe KLP të ngrihen në shtator.