Anija egjiptiane arratiset nga Porti i Durrësit

DURRES- Një anije e mbërritur nga Egjipti me 500 tonë kripë shkarkoi ngarkesën jashtë Portit të Durrësit dhe u arratis pa plotësuar dokumentacionin mëngjesin e djeshëm. Incidenti me mjetin lundrues ndodhi kur kompania pritëse refuzoi të shkarkojë kripën, pasi ngarkesa ishte lagur nga shiu dhe ishte përzier me qymyr. Kapitaneria e Durrësit ka nisur hetimet për anijen tregtare, e cila është larguar nga porti pa lejen e autoriteteve shqiptare. Sipas burimeve zyrtare, anija tregtare e ngarkuar me 500 tonë kripë u largua nga porti në orët e para të mëngjesit, pa marrë më parë lejen e nevojshme nga autoritetet portuale. Kapitaneria bën me dije se anija tregtare nga Egjipti kishte sjellë tri ditë më parë 500 tonë kripë për llogari të një biznesi shqiptar. Por pas mbërritjes së sasisë së kripës, ka pasur mosmarrëveshje midis subjektit pritës dhe transportuesit në lidhje me pretendimet për dëmtimin e mallit. Mësohet se biznesmeni shqiptar pretendonte se sasia prej 500 tonë kripë është dëmtuar gjatë transportit me anije sepse është lagur me ujë si dhe është e përzier me qymyr, duke refuzuar të bënte shkarkimin e mallit. Pas konfliktit midis palëve, anija “SEA SCANER” ka dalë nga kalata ku më pas shkarkoi mallin në radën e jashtme të portit dhe u largua pa njoftuar dhe pa plotësuar dokumentacionin. Burime nga kapitaneria e Portit thonë se është Policia Kufitare dhe Roja Bregdetare që merren me sigurinë e portit, përfshirë edhe lëvizjen e anijeve, për sa kohë që anija gjendej në rade jashtë kalatave portuale. Taulant Allka, kreu i Kapitanerisë së Durrësit, tha se largimi i anijes nga porti është përgjegjësi direkte e kapitenit të saj. Allka sqaroi se konflikti tregtar midis kompanisë pritëse të mallit dhe asaj transportuese nuk gjeti zgjidhje për shkak se siguracioni nuk mbulonte dëmin e shkaktuar të 500 tonëve kripë. l. m