Refuzimi i KPA, Gina e Gashi ankohen në Strasburg
Gjykata pranon të shqyrtojë ankimimin e dy prokurorëve të pezulluar
Dy prokurorët e pezulluar, Dritan Gina dhe Rovena Gashi, i janë drejtuar Gjykatës së Strasburgut me një ankimim për çështjen e tyre, pasi u rrëzuan edhe nga Kolegji i Posaçëm i Apelimit. Sipas një njoftimi të shpërndarë nga po ata vetë, Gjykata e Strasburgut ka pranuar të marrë në shqyrtim, nëpërmjet procedurës së njoftimit urgjent të autoriteteve shqiptare dhe kalimit në seancë gjyqësore me prioritet, ankimin e prokurorëve Rovena Gashi dhe Dritan Gina, duke e regjistruar çështjen e tyre me nr. Nr. 29943/ 18 “Gashi dhe Gina kundër Shqipërisë”, dt. 27.06.2018. Dy prokurorët kanë ankimuar një seri procedurash ligjore, të ndjekura nga Komisioni i Pavarur i Kualifikimit, përfshirë edhe Kolegjin e Posaçëm të Apelimit dhe Operacionin Ndërkombëtar të Monitorim- it, si edhe të Prokurorit të Përgjithshëm të Përkohshëm. Duke qenë se çështja e procedurave të ndjekura nga Komi- sioni i Pavarur i Kualifikimit janë objekt shqyrtimi i Gjykatës së Strasburgut, prokurorja Rovena Gashi i ka kërkuar zyrtarisht KPK- së që të pezullojë procedurat e mëtejshme të verifikimit, deri në vendimin përfundimtar të Gjykatës Europiane të të Drejtave të Njeriut. Prokurorët Rovena Gashi dhe Dritan Gina, në aplikimin e tyre, i kanë argumentuar Gjykatës së Strasburgut se institucionet kanë dështuar që t’i sigurojnë një proces të rregullt ligjor, si gjatë procesit të rivlerësimit, ashtu edhe në procesin penal. “Gjatë procesit të rivlerësimit ( vetingut), subjektit Rovena Gashi nuk i është garantuar prej Komisionit të Pavarur të Kualifikimit një trupë gjykuese e pavarur dhe e paanshme, pasi në përbërje të trupës gjykuese të këtij subjekti, madje në pozicionin e Relatores, për 4 muaj ka qenë komisionerja S. Zh., e cila është në kushtet e konfliktit të hapur të interesit me prokuroren”, shkruhet në ankimim. Kujtojmë se Gashi dhe Gina janë shkarkuar nga Arta Marku, pasi janë nën hetim për deklarim të rremë dhe fshehje të të ardhurave. Mirëpo, ata vazhdojnë ende betejën kundër urdhrit të Markut.