I ndërpresin dritat, shkon me armë në zyrat e OSHEE

Qytetari ishte debitor, kërcënon e dhunon punonjësit

Ndërprerja e energjisë elektrike, për pak ka shkaktuar një tragjedi dje në zyrat e OSHEE- së së Fierit.

Një qytetar i irrituar nga ndërprerja e dritave për shkak se ishte debitor, ka shkuar i armatosur dhe ka kanosur punonjësit e saj. Ngjarja ndodhi në orët e paradites së djeshme, teksa sipas të dhënave, aksioni për ndërprerjen e dritave ndaj debitorëve ka nisur po dje që në orët e para të mëngjesit. Ky aksion ka nisur në disa lagje periferike të qytetit, si dhe në zonat Afrim i Ri, Dërmenas, Portëz etj. Sipas burimeve të Policisë, dje në komisariat është kryer denoncimi nga punonjës të OSHEE- së, të cilët kanë deklaruar se një qytetar, identiteti i të cilit ende nuk dihet, kishte ushtruar dhunë ndaj tyre. Ata kanë deklaruar se qytetari i irrituar ishte futur brenda institucionit të tyre dhe me zë të lartë dhe kërcënues kishte kërkuar që të takonte drejtorin e OSHEE- së. Por punonjësit i kanë thënë se drejtori nuk ishte në punë në atë moment. Pas kësaj, qytetari i irrituar ka nisur të dhunojë punonjësit e më pas ka nxjerrë edhe një armë, duke i kërcënuar ata. Më tej ai është larguar me shpejtësi dhe askush nga të pranishmit nuk ka qenë në gjendje që ta ndalojë dhe ta neutralizojë atë. Menjëherë pas kësaj, është kryer denoncimi në Polici. Për të ndihmuar këtë të fundit në identifikimin e personit, i janë dorëzuar edhe kamerat e sigurisë së institucionit, të cilat kanë fiksuar të gjithë ngjarjen.

Ndërkohë, drejtori i OSHEE- së në Fier, Armando Zhuka, pohoi se një per- son ka ardhur dhe është futur në ambientet e institucionit dhe ka kërkuar takim me drejtorin rajonal. Pasi është vënë në dijeni se drejtori nuk ndodhej për momentin, personi në fjalë i ka kërcënuar dhe ka treguar pistoletën. “Personi në fjalë ka dhunuar rojën dhe kur kanë ndërhyrë të tjerët për ta ndalur sherrin, ai i ka kërcënuar të mos afrohen se do të qëllonte”, ka deponuar për Policinë ai. Në të njëjtën kohë, Zhuka ka theksuar se ka edhe pamje filmike, të cilat i janë vënë në dispozicion Policisë dhe më pas është kryer kallëzimi përkatës. Sipas drejtorit të OSHEE- së, këto kërcënime kanë ardhur si pasojë e operacioneve të kryera në terren për ndërprerjen e lidhjeve elektrike debitorëve dhe lidhjeve të paligjshme në zonat ne periferi, lagjet Afrim i Ri, Dërmenas, Portëz dhe lagje të qytetit.