Anija u arratis nga porti i Durrësit, bllokohet nga autoritetet kroate
DURRES- Anija tregtare me flamur të Sierra Leones, që u largua pak ditë më parë nga porti i Durrësit, është bllokuar nga autoritetet kroate për llogari të Kapitanerisë Shqiptare. Aktualisht, anija “Sea Scanner” mbahet rreth pesë milje larg portit të Riekës. Aty do të kryhet kontroll i dokumenteve dhe një hetim për shkelje të kodit detar ndërkombëtar, pasi nuk është plotësuar dhe zbatuar dokumentacioni nga porti i fundit ku ka dalë, çka do të thotë se ka lundruar në mënyrë të paligjshme. Autoritetet portuale në Durrës konfirmuan ndalimin në Kroaci të anijes që u largua pa njoftim nga porti i Durrësit. Anija me flamur të Sierra Leones kishte sjellë rreth 6 mijë tonë kripë, por u largua pas një debati me pritësin e mallit për një sasi të dëmtuar prej 500 tonësh. Anija “Seascaner” me flamur të Sierra Leones kishte sjellë më 26 qershor 6 mijë tonë kripë në Durrës.
Drejtues të portit Durrës kanë sqaruar se pas shkarkimit të sasisë së kripës, drejtuesit e anijes hynë në konflikt me pritësin e mallit, i cili nuk pranoi të merrte pjesën e mbetur prej 500 tonë kripë, pasi ajo ka qenë përzier me qymyr. Palët nuk ranë dakord për sasinë e mbetur dhe dëmshpërblimin e saj. Por subjekti dërgues dhe transportues, që është kompania “Sea Scanner Logistics”, rezulton se ka probleme me siguracionin e mjetit dhe rrjedhi- misht probleme në mbulimin e dëmshpërblimit. Ndaj, pa u zgjidhur ky konflikt tregtar dhe me ngarkesën e zhdoganuar në Durrës, anija me kapiten sirian u largua në orët e para të së shtunës, pa lajmëruar autoritetet shqiptare nga rada portuale e Durrësit. Pronari i subjektit shqiptar, për llogari të të cilit ishte ngarkesa me kripë, ka denoncuar në Polici vjedhjen flagrante të ngarkesës së mbetur në anije dhe mungesën e reagimit të strukturave shtetërore, që mbrojnë sigurinë portuale dhe kufitare në Durrës. Madje, këto të fundit kanë nisur edhe polemikat mes njëra- tjetrës për sa u përket përgjegjësive për largimin e anijes tregtare pa leje. Policia Kufitare, që së bashku me rojën bregdetare janë përgjegjëse për ruajtjen e vijës bregdetare, akuzojnë Kapitan- erinë se i ka informuar me shumë vonesë për largimin e anijes. Policia Kufitare tha për gazetën “Panorama” se, Kapitaneria e ka informuar shumë vonë për largimin e anijes, ndërkohë që ajo ishte larguar 20 milje nga bregdeti i Durrësit. “E kishim të pamundur për ta ndaluar, pasi Kapitaneria na vuri në dijeni shumë vonë, ndërkohë anija ishte larguar 20 milje. Me anë të një shkrese të dërguar në Kapitaneri, kemi kërkuar arsyen pse nuk jemi njoftuar në kohë për këtë ngjarje”, sqaroi shefja e Policisë Kufitare, Lindita Nushi. Nga ana tjetër, kapiteni i portit të Durrësit, Taulant Allkja, deklaron se nuk është faji i Kapitanerisë, por i Qendrës Ndërinstitucionale Operacionale Detare, e cila monitoron hapësirat detare.