Tajlanda feston suksesin e “misionit të pamundur”
Fëmijët futbollistë rrezikojnë të preken nga “sëmundja e shpellës”
Në Tajlandë është festuar për shpëtimin e 12 djemve futbollistë dhe trajnerit të tyre në një mision ndërkombëtar shpëtimi që zgjati tri ditë, që nga e diela dhe nxori në sipërfaqe të rinjtë e bllokuar prej më shumë se dy javësh në shpellën nëntokësore të përmbytur.
Misioni i rrezikshëm në garë me kohën ka marrë vëmendjen e të gjithë botës. Nëse nuk do të kishte shira, 12 djemtë dhe trajneri i tyre do të kishin dalë nga shpella fare lehtë, por rruga e tuneleve nëpër të cilat ata kishin kaluar, nuk ishte më e kalueshme për shkak të përmbytjes nga shirat dhe ata mbetën brenda për rreth 18 ditë. Për t’i nxjerrë që aty, autoritetet tajlandeze kishin menduar ide si shpimi i vrimave në mal ose pritja një muaj derisa shirat musonike të përfundonin dhe djemtë të dilnin jashtë, por kaq shumë kohë do të ishte shumë e rëndë për t’u përballuar nga fëmijët brenda shpellës me lagështirë, në errësirë dhe me pak oksigjen dhe ushqim. Shpëtimi i tyre u quajt fillimisht “Misioni i Pamundur”. Në fund, një ekip zhytësish specialistë, të udhëhequr nga ekspertë britanikë dhe “Thai Navy SEAL”, hynë në shpellë dhe nxorën me sukses djemtë nëpër disa tunele kilometrike të mbushura me ujë, me zhytësit që i kapnin pas vetes një nga një, edhe pse djemtë nuk dinin të notonin, ndërkohë që mbanin edhe bombolat e oksigjenit, që ishte shumë e vështirë të menaxhoheshin në ngushticat e tuneleve. Duke njoftuar përfundimin me sukses të operacionit, shefi i shpëtimit dhe guvernatori i provincës Chiang Rai, Narongsak Osottanakorn, i quajti përpjekjet e ekipit ndërkombëtar të shpëtimit si “Fuqia e dashurisë”. Djemtë tajlandezë dhe trajneri i tyre, që ishin bllokuar në nëntokë janë shtruar në spital. Ata mund të jenë në rrezik të “sëmundjes së shpellës”, siç parashikuan ekspertët. Ata u shpëtuan duke dalë në sipërfaqe të ndihmuar nga zhytësit profesionistë, duke kaluar nëpër tunele nëntokësore klaustrofobike, gjë që i besohet se do t’i lërë të gjithë ata me pasoja klaustrofobie për pjesën tjetër të jetës. Tani të rinjtë janë në rrezik të prekjes nga “sëmundja e shpellës” apo speleonozës, një infeksion mushkërish që mund t’u shkaktojë vdekjen. Katër prej djemve të shpëtu- ar të shtruar në spital dhe të izoluar po përballen me infeksione në mushkëri, por fatmirësisht asnjë nuk ka treguar shenja ethesh, që janë shenjë dalluese e speleonozës. Pas kësaj “aventure” të errët, djemtë e moshës nga 11 në 16- vjeçare dhe trajneri i tyre mundet të mos jenë më në gjendje të notojnë, të qëndrojnë në errësirë apo në dhoma me dyer të mbyllura ndonjëherë, kanë paralajmëruar ekspertët.