“Ja se si do të ndahet Europa në tri pjesë”

Shërbimi amerikan i inteligjencës, CIA dhe agjencia “Stratfor” kanë parashikuar ndryshime të mëdha në tokën europiane, sipas një raporti të publikuar në të përditshmen “Vecernje Novosti” me bazë në Beograd. Parashikimet e CIA- s për Europën në një të ardhme të afërt shohin tri pjesë: Europa e re, Europa e vjetër dhe Europa Ortodokse. Edhe “Stratfor” ka parashikuar gjithashtu ndryshime të mëdha: forcimin e Polonisë dhe Rumanisë nëpërmjet një partneriteti strategjik me SHBA- të, ngritjen e Turqisë si një fuqi rajonale dhe rënien e ndikimit të Gjermanisë. Sipas CIA- s, deri në vitin 2020 do të ketë një bllok perëndimor, që do të jetë “Europa e vjetër”, e përbërë nga Gjermania, Franca, Austria, Mbretëria e Bashkuar, Spanja, Portugalia, Italia, Suedia, Norvegjia, Finlanda. Do të krijohet gjithashtu edhe “Europa e Re” ku do të bëjnë pjesë Letonia, Lituania, Estonia, Polonia, Hungaria, Republika Çeke, Sllovakia, Sllovenia dhe Kroacia, të cilat do të formonin bastionin kryesor ushtarak të Amerikës në Europë. Parashikimet e CIA- s janë në linjë vazhdimësie edhe me ato të bëra dhjetë vite më parë, ku thuhej se vendet e Ballkanit do të hasnin vështirësi në integrimin në BE pas një krize të madhe. Është parashikuar se Serbia, Greqia, Bullgaria, Maqedonia dhe Rumania do të formojnë “Grupin ortodoks” në Europë, ku do të përfshiheshin edhe Shqipëria, Kosova ( e trajtuar si një entitet i ndarë) dhe Bosnje- Hercegovina. Kriza e përmendur, është ajo e vitit 2008, që nisi edhe përçarjen në BE. “Stratfor” në atë kohë parashikoi se nëse BE i mbijeton kësaj krize, do ta ketë shumë të vështirë të ruajë unitetin dhe do të funksionojë në një mënyrë më të fragmentarizuar dhe limituar. “Në dekadën e ardhshme, Europa do të përcaktohet nga rritja e shteteve nacionaliste si forca drejtuese në kontinent. Numri i shteteve nacionaliste ka gjasa të rritet nëpërmjet lëvizjeve separatiste ose vendeve që shkëputen”, tha “Stratfor” në një projeksion të Europës deri në 2025. Tashmë, parashikohet që zona e tregtisë së lirë nuk do të jetë e aftë të funksionojë pa proteksionizëm më të madh. Kjo pritet të godasë veçanërisht Gjermaninë, ndërsa Polonia do të rrisë fuqinë e saj rajonale. Deri në fund të dekadës, Turqia do të rritet në nivelin e një fuqie të rëndësishme rajonale, si rivali kryesor i Iranit. Rënia ekonomike e Europës ndodh gjithashtu për shkak të plakjes së kontinentit, i cili, siç parashihet nga CIA, ndikon jo vetëm humbjen e fuqisë së BE- së si një lojtar botëror, por edhe fatin e NATO- s dhe në përgjithësi të aleancave të vjetra ushtarake.