Anglia bën nxehje me "gjela", Kroacia dilema për formacionin
Anglia e Kroacia do të diskutojnë sot në orën 20: 00 në stadiumin "Luzhniki" të Moskës, biletën e dytë të finales së Botërorit "Rusi 2018". Garet Sauthgejt vazhdon të përdorë metoda sa më pak tradicionale për të tërhequr vëmendjen e lojtarëve të tij dhe mbajtur gjallë interesin e tyre. Të martën, përpara gjysmëfinales me Kroacinë, "Tre Luanët" e kanë kryer procesin e nxehjes, duke u përpjekur të shmangin njëritjetrin me një pulë llastiku në duar. Dikush e mori edhe si provokim për "Gjelat" e Francës, rivalët e mundshëm për finalen e madhe, por nuk ishte asgjë tjetër, veçse një ushtrim për të fituar shpejtësi në lëvizje përpara një ndeshjeje, ku çdo detaj, sado i vogël, do të jetë i rëndësishëm. Garet Sauthgejt e ka shumë të qartë në kokë skuadrën që do të hedhë sot në fushë kundër Kroacisë. Por kjo nuk të thotë se ai nuk ka shqetësimet e tij.
Kroacia - Dilema e madhe e kroatëve përpara Anglisë është formacioni që do të hedhë në fushë trajneri Daliç. Dyshimi më i madh është ai i rolit të mbrojtësit të djathtë, Sime Vrsaljko, i cili u dëmtua në gju në ndeshjen kundër Rusisë. Për çdo rast, Çorluka është gati për ta zëvendësuar, por ylli i Atletikos nuk do të dorëzohet deri në fund dhe dje tha: "Ndieva diçka të çuditshme në gju dhe pasi fola me doktorët, vendosa të dilja në fushë. Nuk është asgjë e tmerrshme, por kam frikë dhe shpresoj që të jem në gjendje që të riaftësohem përpara ndeshjes". Një tjetër dilemë për ballkanasit do të jetë edhe në mesfushë, ku ne mund të shohim Brozoviçin ose Badelj në vend të Kramariçit.
Anglia - Ishullorët nuk kanë asnjë shqetësim përpara Kroacisë. Të 23 "Luanët" janë stërvitur ditën e martë, përfshirë Hendersonin ( tërheqje muskulore kundër Suedisë) dhe Vardinë, i cili e ndoqi çerekfinalen nga stoli pas problemit në ijë ndaj Kolumbisë. Por që të dy u stërvitën normalisht dje në "Spartak Zelenogorsk" dhe do të jenë të gatshëm për gjysmëfinalen. Sauthgejt pritet që të hedhë në fushë të njëjtin formacion, me të cilin ka luajtur në dy ndeshjet e fundit, kundër Kolumbisë dhe Suedisë. I vetmi tjetër opsion është që ai të sakrifikojë një prej trios sulmuese pas Kejnit dhe të aktivizojë Daierin përkrah Hendersonit, siç bëri në miqësoret ndaj Gjermanisë, Holandës dhe Italisë.