Gjonaj: Rrezikon të mos hapet shkolla e Magjistraturës
“Prokuroria ka sjellë veshtirësi për vetingun, raporte vetëm për 24 subjekte”
Ministrja e Drejtësisë, Etilda Gjonaj, kërkon me urgjencë votimin e dy ligjeve, që do t’i hapin rrugë emërimit të magjistratëve të rinj, pasi në të kundërt rrezikohet viti i ri akademik në Shkollën e Magjistraturës.
Në raportimin që bëri në Kuvend për vitin 2017, Gjonaj e cilësoi të domosdoshme votimin e ligjeve që kërkojnë 84 vota, pasi në të kundërt, sipas saj rrezikohet të vijohet me Magjistraturën. “Ju keni qenë prezentë këtu, ministri i Drejtësisë ka autorizuar zv. ministrin të jetë prezent gjatë diskutimeve për ligjin. Ka shumë rëndësi që të zgjidhen të dyja çështjet, që kanë të bëjnë me ndryshimet e propozuara. E para, që t’i jepet mundësia Shkollës së Magjistraturës të hapë vitin e ri shkollor, ku ne themi që po heqim nga sistemi gjyqtarë dhe prokurorë të kor- ruptuar dhe t’u jepet mundësia të hyjnë në këtë shkollë. Nëse ky ndryshim ligjor nuk miratohet, atëherë është e pamundur që Shkolla e Magjistraturës të hapë vitin e ri akademik dhe e dyta, ka të bëjë me kategorinë e kandidatëve për magjistratë, që kanë mbaruar studimet këtë vit. Në konsideratat e mia, jo vetëm që është e ligjshme, por duhet patjetër kur gjyqtarë dhe prokurorë po na dalin nga sistemi ose duke dhënë dorëheqjen, apo nuk kalojnë procesin e vetingut. Nga propozimet nuk ka asnjë risi, thjesht kërkohet të shtyhet periudha tranzitore e ligjit për t’u zbatuar dhe pritjen e ngritjes së institucioneve të reja”, tha Gjonaj. Ministrja e Drejtësisë foli edhe për procesin e rivlerësimit të gjykatësve dhe prokurorëve, ku nuk i kurseu kritikat për organin e Prokurorisë, e cila sipas saj ka sjellë pengesa në procesin e vetingut. “Sipas ligjit 84/ 2016 përcaktohet si organ ndihmës i organeve të vetingut struktura përkatëse e Prokurorisë së Përgjithshme. Vlen të theksohet se kjo strukturë, Drejtoria e Inspektimit, përgjatë 2016- s nuk ka ekzistuar, duke e krijuar një vështirësi dhe duke ndikuar negativisht dhe në procesin e vlerësimit profesional të prokurorëve. Kjo deri në shkurt të 2018- s, kur rezulton se nga KPK- ja në Prokurori ishin dorëzuar raportet vetëm për 24 subjekte, duke sjellë vështirësi në procesin më të rëndësishëm, atë të vetingut”, sqaroi Gjonaj. Ministrja e Drejtësisë iu përgjigj edhe interesit të ishministrit të Drejtësisë, Nasip Naço, në lidhje me çështjen e ekstradimit në Itali të Nazer Seitit, i njohur si financieri i Habilajve. Gjonaj ka sqaruar se kur një hetim penal fillon, hetimi administrativ pushon, ndaj edhe hetimi për këtë rast është mbyllur.