Detaje për operacionin e shpëtimit të fëmijëve të shpellës
Të 12 djemtë tajlandezë, që u shpëtuan nga një shpellë e përmbytur, janë shfaqur të qeshur gjatë një video të xhiruar në spitalin ku ata qëndrojnë. Disa prej djemve shfaqen duke bërë shenja fitoreje, pas maskave të gjelbra kirurgjikale që mbanin në fytyrë, në një njësi izolimi në Chiang Rai, Tajlandën veriore. Pamjet janë shfaqur, ndërkohë që kreu i operacionit të shpëtimit, Guvernatori i Chiang Rai, Narongsak Osottanakorn, në një konferencë i vlerësoi fëmijët si heronj. Ai shfaqi besimin se lojtarët e ekipit të futbollit të të rinjve, “Wild Boar FC” do të rriteshin dhe do të bëheshin qytetarë të mirë. Chaiwetch Thanapaisal, drejtor i Spitalit të Chiang Rai “Prachanukroh” siguroi se “Nuk duhet të shqetësoheni për shëndetin fizik dhe madje as shëndetin e tyre mendor”. Detaje të tjera kanë dalë nga operacioni i shpëtimit të djemve. Pak pasi është shpëtuar edhe trajneri, i cili ishte i fundit që mbeti në shpellë, është prishur pompa e ajrimit. Fatmirësisht, incidenti nuk ndodhi gjatë operacionit. Gjithashtu thuhet se para se të shpëtoheshin, djemtë kanë marrë qetësues dhe më pas kanë nisur rrugëtimin nëpër tunelet e errëta nënujore të shpellës, me shikueshmëri zero, të rrethuar nga thepat e shkëmbinjve. Të 12 fëmijët, nga mosha 11 në 16 vjeç, së bashku me trajnerin e tyre 25- vjeçar qëndruan në shpellë për 18 ditë, pasi mbetën të bllokuar aty me fillimin e shirave musonikë. Radha e shpëtimit të djemve u vendos nga trajneri i tyre. Fatmirësisht, operacioni shkoi mirë. Prindërit kanë qenë në gjendje të shohin fëmijët përmes dritareve të xhamit, por nuk i kanë përqafuar dot ata. “Misioni i pamundur” u kthye në një festë për të gjithë Tajlandën.