Prokurori Adriatik Cama shkarkohet nga detyra për pasurinë e figurën
Komisioni i Pavarur i Kualifikimit vendosi ditën e djeshme në mëngjes që të shkarkojë nga detyra prokurorin e Tiranës, Adriatik Cama. Ky i fundit ngeli në kriterin e pasurisë dhe në integritetin e figurës, pasi përflitet se ka qenë i përfshirë në korrupsion. KPK evidentoi se Cama ka qenë jobashkëpunues gjatë hetimit administrativ. Pritet që vetë prokurori ta apelojë vendimin, të cilin e cilëson si të padrejtë dhe të bazuar në thashetheme. Seanca dëgjimore për prokurorin Adriatik Cama nuk ishte aspak pozitive. Komisioni i Pavarur i Kualifikimit ka gjetur një sërë shkeljes të prokurorit në të tria kriteret e vlerësimit. Kështu, prokurori Cama kishte probleme me pasurinë, integritetin e figurës dhe me aftësitë profesionale. Trupa gjyqësore drejtohej në këtë proces nga Genta Tafa Bungo, me relatore Pamela Qirko dhe anëtare Suela Zhegu. Prokurori Cama, i pranishëm dhe i pashoqëruar nga ndonjë avokat i cilësoi të padrejta rezultatet e hetimit administrative kundër tij. Sipas KPK- së, Cama ka probleme me një apartament 76 metra katrorë të blerë në vitin 2003 dhe të deklaruar me vlera të ndryshme. Relatorja e çështjes tha se kontrata e blerjes së apartamentit nuk përputhej me asnjërin prej deklarimeve dhe kishte si vlerë rreth 34 900 dollarë, kontradikta që, sipas saj, “cenojnë rëndë figurën e prokurorit”. Komisioni vërejti probleme edhe në integritetin e figurës, ku prokurori u përfol si person me kontakte me persona të papërshtatshëm dhe i dyshuar për korrupsion.