“Gjysma e gjyqtarëve fshehin pasurinë, vitin tjetër pa Gjykatë Apeli”
Raporti për gjyqtarët dhe prokurorët, Ganaj: Jemi të kufizuar në mjetet e kërkimit, s’kemi akses në TIMS si organet e Vetingut
Kreu i Inspektoratit të Lartë të Deklarimit dhe Kontrollit të Pasurive, Shkëlqim Ganaj, jep alarmin se vendi vitin e ardhshëm mund të ngelet pa Gjykatë të Apelit.
Gjatë raportimit vjetor në Kuvend, Ganaj theksoi se nga kontrolli i deritanishëm të deklaratave të gjyqtarëve të Gjykatës së Apelit rezulton se gjysma e tyre rezulton me fshehje të pasurive, deklarime të rreme apo konflikte të interesit. Sipas kreut të ILDKPI- së, me tendencën e shfaqur, viti i ardhshëm do ta gjejë vendin edhe pa Gjykatë të Apelit, pas mosfunksionimit të Gjykatës Kushtetuese dhe Gjykatës së Lartë. “Ju jeni në dijeni të rezultateve të para të ligjit për rivlerësimin kalimtar të gjyqtarëve dhe prokurorëve. Të dhënat e para janë shqetësuese. Rezulton që afro 50% e tyre të kenë probleme, qoftë me fshehje të pasurive dhe qoftë me deklarime të rreme apo konflikte të interesit. Është një numër shqetësues, jashtëzakonisht i lartë, duke pasur parasysh që ne si institucion jemi të kufizuar në mjetet e kërkimit dhe në ligj. Kur te ne ka arritur shifra 50%, imagjino ku do të arrijë kjo shifër, kur do të merren në konsideratë edhe dy aspektet e tjera, ai profesional dhe integriteti i figurës. Pra, vetëm për aq sa ne kemi mundësi të bëjmë, shifra ka arritur në 50.1%. Pjesa e gjyqtarëve të Apelit ka pjesën më të lartë të problematikës. Kështu, duke parë që Gjykata Kushtetuese është tani jashtë funksioni, Gjykata e Lartë është me problematika të mëdha, unë mendoj që vitin tjetër ne do të ngelemi edhe pa Gjykatë Apeli, me këtë trend që është paraqitur në të dhënat e para”, tha Ganaj.
KONTROLLI
Sipas kreut të ILDKPI- së, janë marrë nën shqyrtim deklaratat e afro 800 gjyqtarëve dhe prokurorëve, ku prioritet kanë pasur drejtuesit e institucioneve të drejtësisë apo kandidatët për institucionet e reja të drejtësisë, siç janë KLPja dhe KLDGJ- ja. “Viti 2017 në përgjithësi ka qenë i përqendruar në ligjin për rivlerë- simin kalimtar të gjyqtarëve dhe prokurorëve. Nga janari, ne pritëm rreth 800 deklarata të gjyqtarëve dhe prokurorëve dhe nga shtatori dhe tetori, me konstituimin e organeve të rivlerësimit kalimtar, ne dorëzuam dosjet dhe raportet përfundimtare fillimisht për listën prioritare, që përfshinte: Gjykatën e Lartë, Gjykatën Kushtetuese, kandidatët për Këshillin e Lartë të Prokurorisë dhe kandidatët për Këshillin e Lartë Gjyqësor, anëtarët e Këshillit të Emërimeve në Drejtësi dhe prokurorët e Prokurorisë së Përgjithshme”, sqaroi kreu i ILDKPI- së.
AKSESI
Kreu i ILDKPI- së shprehu shqetësimin e tij lidhur me aksesin që institucioni i tij ka për subjektet që bëjnë deklarime. Përballë interesit të kreut të Komisionit të Ligjeve lidhur me disa vendimmarrje të ndryshme nga Komisioni i Pavarur i Kualifikimit për gjyqtarë dhe prokurorë, Ganaj theksoi se ILDKDPI- ja ka akses të kufizuar në institucione. “Inspektorati është i kufizuar në atë që bën. Ne jemi të kufizuar në sistemin TIMS, ndryshe nga ata. Ne kemi akses vetëm në Hipoteka, Tatime, banka dhe kaq. Ndërsa Komisioni i Pavarur i Kualifikimit ka akses te të gjitha dhe ka edhe kohën. Ne kemi bërë pasqyrën deri në atë që kemi gjetur, për ato që kemi pasur akses”, tha Ganaj.