Farmacistët, edhe tri ditë afat për praktikën profesionale

Të diplomuarit në Farmaci, që duhet të kryejnë praktikën profesionale për t’u futur në provimin e shtetit, kanë edhe tri ditë afat për t’u regjistruar pranë Urdhrit të Farmacistëve. Ky i fundit ka zbardhur dokumentacionin që duhet për praktikën profesionale për sezonin korrik- tetor 2018. “Regjistrimet për kryerjen e praktikës profesionale do të kryhen deri më 16 korrik 2018. Praktika kryhet në farmacitë e rrjetit të hapur ose spitalore, nën drejtimin e një farmacisti me jo më pak se tre vite përvojë pune”, nënvizohet në njoftimin e Urdhrit. Për t’u regjistruar, të interesuarit duhet të dorëzojnë një listë dokumentesh si: kërkesa TIP që gjendet në faqen e UFSH, vetëdeklarim, kontratë tip për kryerjen e praktikës profesionale, një fotokopje e certifikatës së anëtarësimit në UFSH të drejtuesit të praktikës, fotokopje të noterizuar të diplomës dhe listës së notave, fotokopje të kartës së identitetit, raport mjeko- ligjor, fotokopje e planvendosjes së farmacisë si dhe tre fotografi në formatin 3x3.5 cm. Përpara dorëzimit të dokumenteve, farmacistët duhet të kenë bërë paraprakisht pagesën prej 10 mijë lekësh në një bankë të nivelit të dytë për llogari të Urdhrit. Praktika profesionale e detyrueshme 3- mujore duhet të kryhet në ato farmaci, që plotësojnë standardet për realizimin e kërkesave dhe përvetësimin e njohurive praktike- teknike dhe etike të praktikantit. Realizimi me sukses i këtij hapi çel rrugën për t’u futur në provimin e shtetit, nga i cili përfitojnë licencën, thënë ndryshe, të drejtën për të ushtruar profesionin e tyre.